Batys Qazaqstanda óndiristegi jazataıym oqıǵadan 8 adam zardap shekti
ORAL. KAZINFORM — Batys Qazaqstan oblysynda bıylǵy birinshi toqsanda óndirispen baılanysty 6 jazataıym oqıǵa (ótken jyly osy merzimde – 8) tirkeldi.
BQO boıynsha eńbek ınspektsııasy departamentiniń basshysy Asylulan Dosjanovtyń málim etkenindeı, jazataıym oqıǵalardan barlyǵy 8 adam (2024 jyly – 9) zardap shegip, sonyń ekeýi (ótken jyly – 2) qaza tapty. Ekeýi (2024 jyly – 5) aýyr jaraqat aldy. Toptyq jazataıym oqıǵalarǵa 4 adam (2) kezikti.
Asylulan Tursynulynyń sózine qaraǵanda, bıyl 12 arnaıy tergep-tekserý (2024 jyly úsh aıda – 13) júrgizilse, sonyń altaýy (8) óndirispen baılanysty boldy.
- Qazirgi ýaqytta zardap shekken 6 qyzmetkerge qatysty 6 arnaıy tergep-tekserý júrgizilýde. Quqyq qorǵaý organdaryna 6 materıal joldandy, - deıdi A.Dosjanov.
Onyń aıtýynsha, memlekettik organdar jazataıym oqıǵalardyń aldyn alý jáne qyzmetkerlerdi qaýipsiz eńbek jaǵdaıymen qamtamasyz etý baǵytynda júıeli jumys júrgizip keledi. Mysaly, 2024 jyly «Qaýipsiz eńbek» aktsııasy aıasynda eńbek ınspektorlary 50-den astam ónerkásip jáne qurylys uıymyna baryp, eńbek jaǵdaıymen tanysty. Nátıjesinde jumys berýshilerge anyqtalǵan zańbuzýshylyqtardy joıý boıynsha usynymdar berildi.
- Profılaktıkalyq is-sharalarǵa qaramastan, óndiriste jaraqattaný oqıǵalary oryn alýda. Aıtalyq, 2024 jyly 87 jazataıym oqıǵa (2023 jyly – 72) boıynsha arnaıy tergep-tekserý júrgizilse, sonyń 64 paıyzy óndirispen baılanysty dep tanyldy. Jalpy, ótken jyly 56 jazataıym oqıǵa tirkeldi, bul aldyńǵy jylǵydan (48) 14 paıyzǵa artyq. Sonyń saldarynan 68 qyzmetker zardap shekti, bul 2023 jylǵydan (56) 17 paıyzǵa kóp. Sonyń ishinde altaýy kóz jumdy, 42-si aýyr jaraqat aldy, - dedi departament basshysy.
Júrgizilgen taldaýlar kórsetkenindeı, jumys berýshiler kóptegen jaǵdaıda eńbek zańnamasynyń talaptaryn tıisti deńgeıde oryndamaı otyr. Keıbir jumys berýshiler eńbek qaýipsizdigi men eńbekti qorǵaý boıynsha tipti negizgi talaptardyń ózine salǵyrt qaraıdy.
Eske sala keteıik, budan buryn Oralda basyna kirpish qulaǵan er adam kóz jumǵanyn jazǵan bolatynbyz.