Batys Qazaqstanda on kúnde 50-ge jýyq adamnan qyzylsha anyqtaldy

Batys Qazaqstan oblysynda bıylǵy on kúnde 48 adamnan qyzylsha anyqtaldy, dep habarlaıdy Kazinform. 

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, óńirde qyzylshaǵa shaldyqqandar sany ósip otyr.

Nurlybek Ermekulynyń sózine qaraǵanda, ótken jyly oblysta 477, bıyl 48 adamnyń osy dertpen syrqattanǵany rastaldy.

Oblysta qyzylsha Bókeı ordasy men Jánibekten basqa barlyq aýdanda tirkeldi.

Bıyl 1 jasqa deıingi 7 sábı aýyrsa, sondaı-aq 16-sy – 1-4, 8-i – 5-14, tórteýi – 15-18 jas aralyǵyndaǵylar. 13-i – eresek adam.

Departament basshysy orynbasarynyń aıtýynsha, ulttyq profılaktıkalyq ekpe kúntizbesine sáıkes 6 jasqa deıingi balalar ımmýnıtetti qamtamasyz etetin, múgedektikke soqtyrýy múmkin juqpaly aýrýlarǵa qarsy negizgi 10 ekpeni alýy kerek. Alaıda sońǵy jyldary vaktsınadan bas tartýshylardyń kóbeıip otyrǵany baıqalady. Bul qyzylsha sııaqty juqpaly dertterdiń órshı túsýine soqtyrýy múmkin.

«Qyzylshanyń arnaıy emi joq, tek ekpe alý arqyly ǵana odan qorǵanýǵa bolatyny málim. Qyzylshaǵa qarsy vaktsına Ulttyq ımmýndaý kúntizbesine engizilgen. Balalarǵa egý 1 jasta, al revaktsınatsııa 6 jasta júrgiziledi, ekpeden keıin ınfektsııadan qorǵaıtyn ımmýnıtet paıda bolady. Sondyqtan aýrýdyń aldyn alý úshin ekpe alýdyń mańyzy zor. Kúni búginge deıin ekpe alýǵa jatatyn kontıngenttiń 60 paıyzdaıy egilip úlgergen. Sonymen qatar turǵyndarǵa ózdiginen em qabyldamaı, aýrýdyń alǵashqy belgileri baıqalǵanda, medıtsınalyq kómekke júginý qajettigin eske salamyz», - dedi N.Mustaev.

Eske sala keteıik, budan buryn Batys Qazaqstanda JRVI-ge shaldyqqandar sany 86 myńnan asqanyn jazǵan bolatynbyz.