Batys Qazaqstanda on aıda 7 500-ge jýyq náreste dúnıege keldi

ORAL. KAZINFORM — Batys Qazaqstan oblysynda «Azamattarǵa arnalǵan úkimet» memlekettik korporatsııasy» KEAQ BQO boıynsha fılıalynyń qyzmetkerleri on aı ishinde 435 693 qyzmet kórsetti.

BQO boıynsha fılıal dırektorynyń orynbasary Asqar Sandybaevtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 311 827-si ózine-ózi qyzmet kórsetý sektory arqyly júzege asqan.

Onyń sózine qaraǵanda, elektrondyq tsıfrlyq qoltańbany, jeke kýálik pen pasportty, júrgizýshi kýáligin berý, jyljymaıtyn múlikke quqyqtardy tirkeý jáne avtomobılderdi qaıta tirkeý asa suranysqa ıe memlekettik qyzmetter bolyp sanalady. Tsıfrlandyrý saıasatynyń aıasynda Egov, Telegramm bot, Egov mobile qosymshasy, ekinshi deńgeıli bankter qosymshalar platformasynda memlekettik qyzmet túrlerin ońaı alýǵa bolady.

A.Sandybaevtyń aıtýynsha, áleýmettik sala boıynsha memlekettik qyzmetterdiń 20 túri kórsetiledi. Jyl basynan beri 52 936 myńnan astam qyzmet kórsetildi. Onyń ishinde asyraýshysynan, eńbekke qabilettiliginen jáne jumysynan aırylý boıynsha memlekettik járdemaqy alý, múgedektik, bala týý jáne oǵan kútim jasaý boıynsha járdemaqy taǵaıyndaý, kópbalaly analarǵa («Altyn alqa», «Kúmis alqa» ıegerleri) arnalǵan qyzmet túrleri proaktıvti formatta qoljetimdi.

- 2023 jyldyń 1 shildesinen bastap AHAJ bólimi memlekettik korporatsııaǵa aýysqany belgili. AHAJ bólimderiniń esebi boıynsha bıylǵy on aıda oblysta 7 495 náreste dúnıege kelgen. Sondaı-aq 3 368 neke tirkelse, 514-i buzylǵan. Oǵan qosa 131 adamnyń qaıtqany esepke ilikken. AHAJ bólimderi aqyly jáne tegin qyzmet kórsetedi. Balanyń týýyn jáne ólimdi tirkeý sııaqty áleýmettik mańyzy bar qyzmetter tegin kórsetiledi, - dedi A.Sandybaev.

Eske sala keteıik, budan buryn Oralda bir jylǵa jetpeıtin ýaqyt ishinde 700-den astam juptyń ajyrasyp ketkenin jazǵan edik.