Batys Qazaqstanda oblystyq jol qaq aıyrylyp, sý shaıyp ketti
ORAL. KAZINFORM — Batys Qazaqstan oblysynda Jaıyq ózeniniń sýy joldy shaıyp ketti.
BQO Jolaýshylar kóligi jáne avtomobıl joldary basqarmasynan málim etkenindeı, oqıǵa 26 sáýir kúni Aqjaıyq aýdany Kónekketken aýyldyq okrýgi aýmaǵynda boldy.
«Saǵat 08.10-da Kónekketken jáne Qamystykól aýyldarynyń arasynda oblystyq mańyzy bar Barbastaý-Aqjaıyq-Inder avtojolynyń 115-shaqyrymynda joldy sý shaıyp ketti (uzyndyǵy – 4-5 metr, eni – 8 metr). Osy tusta avtokólik qozǵalysy toqtatyldy. Kólikter aınalma jol arqyly qatynap jatyr. Zardap shekkender joq eldi mekenderge qaýip tóngen joq. Oqıǵa ornynda Polıtsııa departamenti men jergilikti atqarýshy organdar ókilderi jumys istep jatyr», - dep habarlady vedomstvodan.
Aqjaıyq aýdany Kónekketken aýyldyq okrýginiń ákimi Uldash Qadyrǵalıeva «ıÝnıserv» kompanııasynyń qyzmetkerleri aınalma joldy bıiktetkennen keıin Qamystykól eldi mekenimen aradaǵy baılanystyń qalpyna keltirilgenin jetkizdi.
Eske sala keteıik, budan buryn Oral qalasynda 10 evakýatsııalyq pýnktte 2 400-den astam adam ornalasqanyn jazǵan bolatynbyz.
BQO-da Jaıyq ózenindegi sý deńgeıi Taıpaqtan basqa gıdrobekette tómendedi.
Batys Qazaqstanda gýmanıtarlyq kómek qalaı úlestirilip jatyr.
