Batys Qazaqstanda Naýryzǵa oraı 500-ge jýyq is-shara ótedi
ORAL. KAZINFORM — Batys Qazaqstan oblysynda Naýryz merekesine oraı mádenıet salasynda 500-ge jýyq is-shara uıymdastyrylmaq.
BQO mádenıet, tilderdi damytý jáne arhıv isi basqarmasynyń basshysy Saıran Dúısenovtiń óńirlik kommýnıkatsııalar qyzmeti alańynda ótken brıfıngte málim etkenindeı, bıyldan bastap Naýryz meıramy 14 — 23 naýryz aralyǵynda Naýryznama onkúndigi aıasynda atalyp ótpekshi.
Onyń sózine qaraǵanda, ár kún belgili bir taqyrypqa arnalyp, tereń mán-mazmunǵa ıe bolmaq.
14 naýryz — Kórisý aıt kúni oblys pen aýdan ortalyqtary, eldi mekenderde túrli formattaǵy merekelik sharalar ótetin bolady.
«Atameken» óner ordasynda respýblıkalyq VІІ «JAIYQ SAZY» dástúrli óner festıvali ótkiziledi. QR Tuńǵysh Prezıdenti alańynda aýdandardyń kıiz úıleri tigilip, kontserttik baǵdarlama qoıylmaq.
«Festıval halqymyzdyń mádenıetin saqtaýǵa jáne urpaqtan-urpaqqa jetkizý arqyly dástúrli ónerimizdiń tól týyndylaryn nasıhattaýǵa baǵyttalǵan. Festıvalge respýblıkamyzdyń ár óńirinen kúıshi, ánshi, jyrshy-termeshiler, atap aıtqanda, QR halyq ártisi Ramazan Stamǵazıev, QR eńbek sińirgen ártisi Sáýle Taýdaeva, QR eńbek sińirgen qaıratkerleri Erbol Aıtbaev, Dáýrenbek Árkenov, Erkin Shúkimanov, Ardaq Isataeva, jalpy sany 21 óner ıesi qatysady» dedi Saıran Temirǵalıuly.
15 naýryz kúni qaıyrymdylyqqa kezek beriledi. Bul kúnniń basty qundylyǵy, adamdardyń bir-birine janashyrlyq tanytyp, ózara kómek kórsetýine baǵyttalǵan.
Sondyqtan muqtaj jandardy, oblystaǵy múmkindigi shekteýli azamattar turyp jatqan ońaltý ortalyqtarynda, jetim jáne ata-anasynyń qamqorlyǵynsyz qalǵan balalarǵa arnalǵan bilim mekemelerinde merekemen quttyqtaý sharalary uıymdastyrylady.
Sonymen qatar Ekinshi dúnıejúzilik soǵys jáne eńbek ardagerleriniń, jalǵyz basty qarııalar, múmkindigi shekteýli jandardyń úıleri men aýlalaryn tazalaý jumystary júrgiziletin bolady.
Bıyl Naýryz meıramy musylmandar úshin qasıetti aı — Ramazanǵa tuspa-tus kelip otyrǵany belgili. Osyǵan oraı oblys, qala, aýdan ákimderiniń atynan aýyzashar uıymdastyrylady.
Basqarma basshysynyń aıtýynsha, 16 naýryz — mádenıet jáne ulttyq salt-dástúr kúni mádenıetti, ónerdi jáne ulttyq qundylyqtardy nasıhattaýǵa arnalady.
Jergilikti qolónershilerdiń ulttyq qolóner týyndylarynyń kórmeleri men jármeńkeleri, ulttyq taǵamdar festıvali ótkiziledi.
Mádenıet mekemelerinde «Salt dástúrim — qazynam» dóńgelek ústeli jáne «Besikke salý» rásimi ótkiziledi.
17 naýryz — shańyraq kúni ulttyq kıim kıgen jastardyń neke qııý saltanaty ótkizilip, kópshilikke syıly aqsaqaldar men kópbalaly analar «Naýryz bata» beredi, jas jubaılarǵa, elge baq-bereke tileıdi.
Barlyq eldi mekende 50 jyl otasqan otbasylar arasynda «Altyn shańyraq» jáne 25 jyl otasqan otbasylar arasynda «Kúmis kerege» atty baıqaýlar qorytyndylanyp, marapattar tabystalady.
18 naýryz — ulttyq kıim kúnine oraı otandyq, ulttyq kıimderdi ulyqtaý sharasy ótkiziledi. Bul rette jergilikti belgili dızaınerlerdiń uıymdastyrýymen ulttyq naqyshtaǵy kıimderdiń sán kórsetilimi ótedi.
19 naýryz — jańarý kúni kóktemgi aǵash otyrǵyzý aktsııasy jáne tazalyq jumystary uıymdastyrylady.
20 naýryz — ulttyq sport kúni Oral qalasy men barlyq aýdandarda ulttyq sport oıyndary (at jarys, báıge, aýdaryspaq, jamby atý, teńge ilý syndy) ótkizilip, sporttyq jarystar, týrnırler uıymdastyrylady.
21 naýryz — yntymaq kúni Memleket basshysy Qasym-Jomart Kemeluly Toqaevtyń qazaqstandyqtardy Naýryz meıramymen beıne quttyqtaýymen bastalyp, merekelik lebizder óńirlerde jalǵasady. Aýdandarda «Naýryz — Ulystyń uly kúni» qolóner sheberleriniń jármeńkesi, ulttyq taǵamdar festıvali jáne basqa merekelik sharalar ótkiziledi.
22 naýryz — Ulystyń uly kúni oblys, aýdan ortalyqtarynda jáne eldi mekenderde Naýryz merekesine arnalǵan stıldi etnoaýyldar ornatylyp, merekelik jármeńkeler men kórmeler kóz tartpaq.
Oral qalasynda ádettegideı Tuńǵysh Prezıdent alańynda kıiz úıler tigilip, ulttyq oıyndar men salt-dástúrler kórsetilip, ulttyq taǵamdar (naýryz kóje, baýyrsaq) usynylady, sonymen qatar qolóner sheberleriniń jármeńkesi kelýshiler nazaryn aýdarmaq. Ózge de túrli mádenı-sporttyq sharalar jalǵasyn tabady.
«23 naýryz — tazarý kúni „Tazalyq estafetasynan“ bastalyp, sýat kózderin, aýlalardy qardan jáne qoqystan, onyń ishinde merekeden keıingi qaldyq zattardan tazalaý is-sharalaryna kezek tıedi. Turǵyn-úı kommýnaldyq sharýashylyǵy jáne energetıka basqarmasymen uıymdastyrylatyn „Naýryz naqyshymen bezendirilgen tartymdy úı“, „Eń taza podezd“, „Naýryz stılimen bezendirilgen ádemi kóshe“ sekildi baıqaýlar qorytyndylanady» dedi S. Dúısenov.
Brıfıngte sondaı-aq BQO qoǵamdyq damý basqarmasynyń basshysy Gúljanar Shókeeva Naýryznama onkúndigi aıasynda ótkiziletin is-sharalardyń mańyzyn atap kórsetip, oǵan jurtshylyqty belsendi qatysýǵa shaqyrdy.
Oral qalasy ákiminiń orynbasary Arsen Ǵubashev oblys ortalyǵynda ótetin merekelik is-sharalarǵa toqtaldy.
