Batys Qazaqstanda Muratsaı sý qoımasynan kıik ólekseleri tabyldy

ORAL. KAZINFORM — Batys Qazaqstan oblysynyń Bókeı ordasy aýdany Muratsaı sý qoımasynda kıik ólekseleriniń shyǵyp jatqany jóninde áleýmettik jelide beınejazba tarady.

Beınejazbada er adam atalmysh sý qoımasynda aqbóken ólekseleriniń tabylǵany týraly baıandaıdy.

- Kıikterdiń sý qoımasy arqyly ótip jatqanyna birinshi kún. Bul – bir saǵattaı ýaqyt ishinde sýǵa batyp ketkenderi. Bári de – tekeleri. Arǵy bette de shashylyp jatyr, - deıdi turǵyn.

Osyǵan baılanysty BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanov jaýap berdi.

Onyń aıtýynsha, oqıǵa Muratsaı sý qoımasynda boldy. Málimet 4 sáýir kúni keshkisin saǵat 19.00 shamasynda túsken.

- Oqıǵa ornyna «Ohotzooprom» ÓB» RMQK ınspektorlary, «Bókeıorda» rezervaty, bizdiń aýmaqtyq ınspektsııa, jergilikti atqarýshy organ, aýdandyq TJ bólimi qyzmetkerleri bardy.

Barlyǵy 30 kıik batyp ketse, sonyń 25-i – tekeleri. Erteńine ólekseler sýdan shyǵarylyp, algorıtmge sáıkes shuńqyrlarda joıyldy. Tıisti aktiler jasaldy. Muratsaı qoımasyna ótken jyldan beri sý kóp kelýde. Bul kıikterdiń ótý joly bolyp esepteledi, sonda álsizderi sýǵa ketedi. Jaǵdaı baqylaýda, - dedi N.Rahymjanov.

Onyń aıtýynsha, bıyl jyl basynan beri ońtústik aýdandarda daladan barlyǵy 290 kıik óleksesi tabylyp, joıylǵan. 

Muratsaı sý qoımasynda ótken jyly da osyndaı oqıǵa bolyp, kıikter jappaı qyrylǵan edi. 
Eske sala keteıik, budan buryn Batys Qazaqstanda kıik ólekseleri nege kóbeıgenin jazǵan bolatynbyz.