Batys Qazaqstanda múgedektigi bar adamdarǵa qandaı kómek kórsetilip otyr

ORAL. KAZINFORM — Batys Qazaqstan oblysynda jalpy múgedektigi bar 24 719 adam tirkelse, sonyń ishinde 3 130-y – 18 jasqa deıingiler. 

BQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Dildásh Isqaqovanyń óńirlik kommýnıkatsııalar qyzmeti alańynda ótken brıfıngte málim etkenindeı, Qazaqstanda 2025 jylǵa deıin múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar júzege asyrylýda.

Onyń sózine qaraǵanda, Áleýmettik kodeks sheńberinde múgedektigi bar adamdardy áleýmettik qorǵaýdyń kóp deńgeıli júıesi engizilgen, onyń ishinde: memlekettik kómek jáne járdemaqylar men áleýmettik tólemder túrindegi qoldaý, áleýmettik ońaltý aıasynda aǵzanyń joǵalǵan fýnktsııalaryn óteý, arnaýly áleýmettik qyzmetter kórsetý, jumysqa ornalastyrý.

«Múgedektigi bar adamdardy áleýmettik qamtamasyz etýdiń úsh deńgeıli júıesi qalyptasty. Birinshi deńgeı (bazalyq) – memlekettik bıýdjetten múgedektigi boıynsha memlekettik áleýmettik járdemaqy. Onyń mólsheri múgedektiktiń tobyna jáne sebebine, sondaı-aq tıisti qarjy jylyna belgilengen eń tómen kúnkóris deńgeıine baılanysty bolady. Qazirgi ýaqytta oblys boıynsha 17 641 adam memlekettik járdemaqy alyp otyr. Sondaı-aq múgedektigi bar 3 158 balany tárbıelep otyrǵan ata-analarynyń bireýine nemese zańdy ókiline jáne 2 420 birinshi top múgedegine kútim jasap otyrǵandarǵa memlekettik arnaıy járdemaqy tólenýde», - deıdi D.Isqaqova.

Basqarma basshysy orynbasarynyń aıtýynsha, ekinshi deńgeı – memlekettik áleýmettik saqtandyrý qorynan tólenetin áleýmettik tólemder 2024 jyly 7 paıyzǵa artqan.

Úshinshi deńgeı: eger eńbek etý qabiletinen aıyrylý eńbek mertigýimen nemese kásiptik aýrýmen baılanysty bolsa jáne zardap shekken jumyskerdiń paıdasyna jazataıym oqıǵalardan mindetti saqtandyrý sharty jasalǵan jaǵdaıda saqtandyrý uıymynan saqtandyrý tólemderi tólenedi.

Sonymen qatar jergilikti bıýdjet qarajaty esebinen múgedektigi bar adamdarǵa ár túrli áleýmettik kómekter qarastyrylǵan. Osy oraıda aýdandyq jáne qalalyq máslıhattar sheshimderimen bekitilgen erejelerge sáıkes jergilikti bıýdjet qarajaty esebinen bıylǵy 1 tamyzǵa deıin 9 331 adamǵa 367,4 mln teńge kóleminde áleýmettik kómek kórsetildi.

«Qazirgi ýaqytta oblys boıynsha 11 ortalyq, jartylaı statsıonarlyq úlgidegi 1 ortalyq, 2 kúndizgi bolý bólimshesi, úıden áleýmettik qyzmet kórsetetin 31 bólimshe, belgili turaǵy joq tulǵalarǵa arnalǵan 1 mekeme, turmystyq zorlyq-zombylyq qurbandaryna arnalǵan 1 mekeme, úkimettik emes 5 uıym múgedektigi bar adamdar úshin arnaýly áleýmettik qyzmetter kórsetedi. Barlyǵy 5 419 adam arnaýly áleýmettik qyzmetpen qamtyldy. 2025 jyldan bastap arnaýly áleýmettik qyzmetterdi jan basyna qarjylandyrýdy engizý josparlanýda, bul jeke bıznesti tartýǵa yqpal etetin bolady. Bul shara arnaýly qyzmet kórsetetin uıymdardyń jelisin keńeıtýge jáne olardy shalǵaıdaǵy eldi mekenderge jetkizýge múmkindik beredi», - deıdi Dildásh Salaýatqyzy.

Onyń málimdeýinshe, birneshe jyldan beri múgedektigi bar adamdarǵa ońaltýdyń tehnıkalyq quraldary men qyzmetterin óndirýshiler men jetkizýshilerdi óz betinshe tańdaýǵa múmkindik beretin áleýmettik qyzmetter portaly jumys istep keledi. Portal ońaltýdyń jeke baǵdarlamalaryn oryndaý kórsetkishin 93 paıyzǵa deıin arttyrýǵa, sondaı-aq taýarlar men qyzmetterdi usyný protsesteriniń ashyqtyǵyn qamtamasyz etýge múmkindik berdi. Estý jáne kórý qabileti nashar adamdar úshin portaldyń qoljetimdi mobıldi nusqasy engizildi.

«Bıylǵy 1 qyrkúıektegi málimet boıynsha múgedektigi bar 10 715 adam tehnıkalyq kómekshi quraldar jáne áleýmettik qyzmettermen qamtylyp otyr. Sonyń ishinde medıtsınalyq ońaltý baǵytynda 984 adam sanatorıı-kýrortta emdeldi. Áleýmettiq ońaltý baǵytynda 235 adam sýrdologııalyq kómekpen, 1 587 adam tıflotehnıkalyq quraldarmen, 461 adam kreslo-arbamen, 5 050 adam mindetti gıgıenalyq quraldarmen qamtamasyz etildi. Sonymen qatar birinshi toptaǵy múgedektigi bar 778 adamǵa jeke kómekshilerdiń, 265 adamǵa ymdaý tili mamanynyń qyzmetteri usynylady», - deıdi D.Isqaqova.

Oblysta múgedektigi bar adamdardy jumyspen qamtý baǵytynda da tıisti sharalar alynýda.

Eske sala keteıik, budan buryn Batys Qazaqstanda tasqynnan japa shekken 863 otbasynyń áleýmettik kómek alǵanyn jazǵan bolatynbyz.