Batys Qazaqstanda mys kabelderin urlaýmen aınalysqan qylmystyq top ustaldy
ORAL. KAZINFORM — Aqsaı qalasynda mys kabelderin urlaýmen aınalysyp kelgen qylmystyq top quryqtaldy.
BQO polıtsııa departamentiniń baspasóz qyzmetinen málim etkenindeı, Bórli aýdandyq polıtsııa bóliminiń krımınaldyq polıtsııa qyzmetkerleri kásiporyndardyń biriniń qaýipsizdik qyzmetimen birlese otyryp, úsh jas jigitti qolǵa túsirdi.
«Atalmysh top Bórli aýdanyndaǵy munaı-gaz kásiporyndarynyń birine tıesili mys kabelderdi jymqyrǵan. Sondaı-aq aktsıonerlik qoǵamdardyń biriniń akkýmýlıator batareıalaryn urlaǵan. Ustalǵandar Aqsaı qalasynyń turǵyndary ekeni anyqtaldy. Olardyń turǵylyqty jeri boıynsha sanktsııalanǵan tintý sharalaryn júrgizý kezinde kúdiktilerden urlanǵan zattar jartylaı tárkilendi. Sonymen qatar polıtsııa qyzmetkerleri jymqyrylǵan zattardy satyp alýshyny anyqtady. Ustalǵandar ýaqytsha ustaý ızolıatoryna qamaýǵa alyndy. Keltirilgen shyǵyn kólemi anyqtalýda. Urlyq derekteri boıynsha 6 epızod negizinde qylmystyq is qozǵalyp, tergeý amaldary júrgizilýde. Olardyń osyǵan uqsas basqa da qylmysqa qatysy bar-joǵy tekserilip jatyr», - dep habarlady vedomstvodan.
Eske sala keteıik, budan buryn Oralda jumysshynyń kópirden qulap, mert bolýyna baılanysty tergeý júrgizilip jatqanyn jazǵan bolatynbyz.
