Batys Qazaqstanda metapnevmovırýspen aýyrǵan 8 adamnyń teń jartysy – balalar

ORAL. KAZINFORM – Batys Qazaqstan oblysynda metapnevmovırýspen aýyrǵandar sany 8 adamǵa jetti.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń Kazinform tilshisine málim etkenindeı, sonyń tórteýi – balalar. 

Qazirgi tańda naýqastardyń barlyǵy da jazylyp shyqty, asqynýlar bolǵan joq. 
Nurlybek Ermekulynyń sózine qaraǵanda, metapnevmovırýs – tynys alý joldaryn zaqymdaıtyn, JRVI jáne tumaý aýrýlarynyń maýsymdyq órshý kezinde taralatyn klassıkalyq vırýs túri. Bul vırýs álemniń kóptegen elinde kezdesedi.

- Mamandardyń paıymdaýynsha, barlyq eresek adamdar men 10 jastan asqan balalar bul vırýspen ómirinde bir ret bolsa da aýyrady. Biraq vırýsqa qarsy ımmýnıtet uzaq ýaqyt saqtalmaıdy. Sondyqtan qaıta juqtyrý jıi kezdesedi, - deıdi N.Mustaev.

Onyń aıtýynsha, metapnevmovırýs aýamen, ıaǵnı jótelgende nemese túshkirgende aýa tamshylary arqyly beriledi. Munyń eń jıi kezdesetin belgileri – jótel, murynnyń bitelýi, demigý. Vırýs qoǵamnyń osal toptary: balalar, 65 jastan asqandar jáne ımmýnıteti tómen adamdar úshin qaýipti bolýy múmkin. Bul toptarda vırýs tynys alý joldarynyń tómengi bólikterin zaqymdap, bronhıt nemese pnevmonııaǵa soqtyrýy yqtımal.

- Metapnevmovırýstyń aldyn alý úshin qoldy jıi jýyp nemese antıseptık qoldaný kerek. Muryn, aýyz, kóz qabattaryn las qolmen ustamaý mańyzdy. Jótelgende nemese túshkirgende, aýzyńyzdy oramalmen nemese shyntaǵyńyzben jabyńyz. Adam kóp jerlerde betperde taǵyp, qashyqtyqty saqtaǵan durys. Durys tamaqtaný, sportpen shuǵyldaný jáne jaqsy uıyqtaý arqyly ımmýnıtetti kúsheıtýge bolady, - dedi N.Mustaev.

Eske sala keteıik, budan buryn Batys Qazaqstanda 1 300-den astam adamnyń qyzylshamen aýyrǵanyn jazǵan bolatynbyz.