Batys Qazaqstanda Memleket basshysynyń atynan aýyzashar berildi
ORAL. KAZINFORM - Aýyzasharǵa óńirde ár salada qyzmet etip júrgen azamattar, eńbek adamdary, zııaly qaýym ókilderi men qoǵam belsendileri qatysty.
Jınalǵandardy Batys Qazaqstan oblysynyń ákimi Narıman Tóreǵalıev quttyqtady.
«Barshańyzdy qasıetti Ramazan aıymen quttyqtaımyn. Ramazan aıy – kúlli musylman qaýymy úshin erekshe mezet. Bul aıdyń rýhanı turǵyda damýymyz úshin de paıdasy zor. Sebebi Ramazan keshirimdi bolýǵa, qaıyrymdylyq pen ıgi ister jasaýǵa úndeıdi. 2022 jyly alǵashqy ret Aqordada Qazaqstan Prezıdenti atynan arnaıy aýyz ashar berilgen bolatyn. Bul bastama bıyl da óz jalǵasyn taýyp, barlyq oblysta Prezıdentimiz Qasym-Jomart Toqaevtyń atynan oraza ustaýshylarǵa aýyzashar berilip jatyr. Osy aıda jasaǵan duǵa-tilekterińiz ben ustaǵan orazalaryńyz qabyl bolsyn! Naýryz meıramy da qut-bereke ákelsin! Elimiz aman, jurtymyz tynysh bolsyn!» - dedi oblys ákimi.
