Batys Qazaqstanda mektep avtobýsy jol apatyna ushyrady
ORAL. KAZINFORM – Batys Qazaqstan oblysy Terekti aýdany Podstepnyı aýylynda jol-kólik oqıǵasy boldy.
BQO Polıtsııa departamentiniń baspasóz qyzmetinen málim etkenindeı, oqıǵa jóninde búgin saǵat 14.00-da habar túsken.
Aldyn ala málimetke qaraǵanda, respýblıkalyq mańyzy bar Samara-Shymkent avtojolynda marshrýttyq jolaýshylar avtobýsy mektep avtobýsyn art jaǵynan soqqan. Saldarynan mektep avtobýsy alda turǵan Ford Galaxy avtokóligimen túıisken.
– Jol apatynan zardap shekkender, sonyń ishinde jasóspirimder bar. Barlyǵyna medıtsınalyq kómek kórsetildi. Atalǵan derek boıynsha qylmystyq is qozǵaldy. Marshrýttyq avtobýstyń júrgizýshisi ýaqytsha ustaý ızolıatoryna qamaldy. Oqıǵa ornynda polıtsııa qyzmetkerleri jumys istedi. Oqıǵanyń mán-jaıy anyqtalý ústinde, árbir qatysýshynyń is-áreketine quqyqtyq baǵa beriletin bolady, - dep habarlady vedomstvodan.
BQO Densaýlyq saqtaý basqarmasynyń baspasóz qyzmeti aqparatty keıin beretinin jetkizdi.
Eske sala keteıik, budan buryn Oralda bopsalaý jáne tonaýmen aınalysqan qylmystyq top quryqtalǵanyn jazǵan edik.
