Batys Qazaqstanda maldy jaıý qaǵıdalaryn buzǵan 2 myńnan astam adamǵa aıyppul salyndy

ORAL. KAZINFORM – Batys Qazaqstan oblysynda bıylǵy toǵyz aıda 51 mal urlyǵy deregi tirkeldi.

BQO polıtsııa departamenti krımınaldyq polıtsııa basqarmasy bastyǵynyń orynbasary Artýr Musaǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, qoldy bolǵan 343 maldyń 217-si nemese 63,2 paıyzy ıelerine qaıtaryldy.

Artýr Ǵaısaulynyń sózine qaraǵanda, QR Іshki ister mınıstrliginiń urlyqtarǵa qarsy is-qımyl jónindegi baǵdarlamasyn júzege asyrý aıasynda qabyldanǵan aldyn alý is-sharalarynyń nátıjesinde óńirde sońǵy bes jylda mal urlyǵy azaıyp keledi. Atap aıtqanda, 2020 jyly – 345, 2021 jyly – 185, 2022 jyly – 184, 2023 jyly 174 mal urlyǵy tirkelgen.

«Aýyr sanattaǵy mal urlyǵynyń ashylýy 89,3 paıyz bolyp, ótken jylǵydan (80,3 paıyz) 9 paıyzǵa ósti. Qylmystyń jasalýyna basty sebep – maldyń qaraýsyz júretini. Aıtalyq, tirkelgen mal urlyǵynyń 80,3 paıyzy (41 derek) erkin jaıylymda oryn alǵan. Sonymen qatar ıeleri maldary joǵalǵannan keıin kesh habarlaıdy, ıaǵnı 10 kún, eń kóbi 1 jyl ótken soń polıtsııaǵa júginedi», deıdi A.Musaǵalıev.

Onyń aıtýynsha, tek 10 derek boıynsha mal qoradan urlansa, sonyń 9-y ashylǵan.

Jedel is-sharalar nátıjesinde jyl basynan beri 238 maldy jymqyrǵan 6 qylmystyq top pen 49 ury ustalǵan.

Taǵy bir másele – mal ıeleri aýyl sharýashylyǵy janýarlaryn jaıý qaǵıdasyn buzbaýy tıis.

«Osy qaǵıda talaptaryn buzǵan 2 096 mal ıesi QR Ákimshilik quqyq buzýshylyq kodeksi 408-babyna sáıkes jaýapqa tartylyp, olarǵa 18 mln 696, 288 myń teńge aıyppul salyndy. Sonymen qatar oblys joldarynda mal jáne et ónimderin zańsyz tasymaldaýǵa qatysty 218 quqyq buzýshylyq anyqtalyp, kináliler atalmysh kodekstiń 406-babyna sáıkes 4 mln 810, 350 myń teńge aıyppul arqalady», dedi A.Musaǵalıev.

Eske sala keteıik, budan buryn Oralda joǵalyp ketken jigittiń qystaqta mal baǵyp júrgen jerinen tabylǵanyn jazǵan bolatynbyz.