Batys Qazaqstanda mal ólekselerin joıý jumystary júrgizilip jatyr
ORAL. KAZINFORM - Batys Qazaqstan oblysynda sýǵa ketken eldi mekender aýmaǵynda mal ólekselerin jınaý jáne joıý jumystary júrgizilip jatyr.
BQO veterınarııa basqarmasynyń baspasóz qyzmetinen málim etkenindeı, aýdan ákimdikteri janynan qurylǵan komıssııa usynǵan aqparatqa sáıkes oblysta 236 bas iri qara (Bórli aýdanynda - 33, Qaratóbede - 79, Syrymda - 68, Terektide - 56), 1 677 usaq mal (Báıterekte - 1, Bórlide - 226, Qaratóbede - 949, Syrymda - 322, Terektide - 179), 51 jylqy (Bórlide - 40, Qaratóbede - 3, Syrymda - 8), Báıterekte 7 bas shoshqa jáne 81 úı qusynyń (Qaratóbede - 74, Syrymda - 7) ólgeni rastaldy.
Mal ólekselerin joıý bıologııalyq qaldyqtardy joıý qaǵıdalaryna sáıkes jer transheıalarynda (shuńqyrlarda) órteý jolymen júrgizilip jatyr.
Ólekselerdi jınaý jáne joıý jumystaryna veterınarııalyq ınspektsııa, veterınarııalyq stantsııa jáne respýblıkalyq epızootııaǵa qarsy otrıad (REQO) qyzmetkerleri jumyldyryldy.
«Kúni búginge deıin oblys boıynsha 230 bas iri qara, 1 677 usaq mal, 51 jylqy, 7 shoshqa, 81 úı qusynyń ólekseleri joıyldy. Ólekseler jatqan aýlalar men qora-jaı oryndaryn veterınarııalyq stantsııa men REQO qyzmetkerleri «Glıýzamın» dezınfektsııalyq quralymen zalalsyzdandyrý jumystaryn júrgizýde», - dep habarlady vedomstvodan.
Eske sala keteıik, budan buryn sý basqan aýmaqtarda juqpaly aýrý juqtyrmaý úshin ne isteý kerektigin jazǵan bolatynbyz. Sondaı-aq Batys Qazaqstanda sý basqan jerlerde ishek aýrýlary tirkelgen joq.
