Batys Qazaqstanda mal qorymdarynyń kópshiligi talapqa saı kelmeıdi
ORAL. KAZINFORM – Batys Qazaqstan oblysynyń eldi mekenderinde 260 mal qorymy tirkelgen, sonyń 65-i – úlgi jobadaǵy (bıometrııalyq), 195-i – qarapaıym shuńqyrlar.
BQO veterınarııa basqarmasy basshysynyń orynbasary Nurqaıyr Qusaıynovtyń óńirlik kommýnıkatsııalar qyzmeti alańynda ótken brıfıngte málim etkenindeı, qazirgi ýaqytta mal qorymdarynyń kópshiligi tozǵan, talapqa saı kelmeıdi.
Nurqaıyr Ǵaınollaulynyń sózine qaraǵanda, bıyl Bókeı ordasy aýdanynda Bısen, Uıaly aýyldyq okrýgterinde 68 mln teńgege, Báıterekte Darııan jáne Jeleznov aýyldarynda 42 mln teńgege úlgi jobadaǵy 4 jańa mal qorymy salyndy.
«Oǵan qosa Shyńǵyrlaý aýdanynda 38 mln teńgege taǵy bir mal qorymynyń qurylysy aıaqtalyp keledi. Sonymen qatar janýarlardyń ólekselerin jaǵý arqyly joıýǵa arnalǵan 6 gaz ınsıneratoryn satyp alýǵa oblystyq bıýdjetten 88,8 mln teńge bólindi. Kúni búgin memlekettik satyp alý sharalary ótkizilýde», - dedi N.Qusaıynov.
Onyń aıtýynsha, oblys aýmaǵynda 222 sibir jarasy kómindisi bar. Bul kómindilerdiń jaǵdaıyna, qorshaýlarynyń bolýyna turaqty baqylaý jasalyp otyrylady.
«Bıyl 85 sibir jarasy kómindisin qalpyna keltirýge jergilikti bıýdjetten 21,6 mln teńge qarastyrylyp, Qaratóbe aýdanynda – 2, Báıterekte – 11, Kaztalovta – 14, Syrymda – 29, Terektide 29 kómindide jumystar aıaqtaldy», - dedi basqarma basshysynyń orynbasary.
Basqarma málimeti boıynsha oblysta aýyl sharýashylyǵy janýarlarynyń asa qaýipti juqpaly aýrýlary boıynsha epızootııalyq jaǵdaı turaqty. Jyl basynan beri janýarlardyń asa qaýipti juqpaly aýrýlarynyń 4 oshaǵy tirkelgen. Atap aıtqanda, Terekti aýdany Terekti aýyldyq okrýginde iri qara brýtsellezi, Kaztalov aýdany Tereńkól aýyldyq okrýgi Nursaı aýylynda ıttiń qutyrýy, osy aýdanǵa qarasty Qaraoba men Tasqala aýdany Shejin aýyldyq okrýginde qarasan aýrýyna baılanysty tıisti shekteýler qoıylyp, veterınarııalyq saýyqtyrý is-sharalary júrgizildi.
Eske sala keteıik, budan buryn Batys Qazaqstanda mal ólekselerin joıý jumystary júrgizilip jatqanyn jazǵan bolatynbyz.
