Batys Qazaqstanda Mádenıet úıiniń qurylysy merziminde bitpeı qalýy múmkin

ORAL. KAZINFORM — Batys Qazaqstan oblysynda jemqorlyqqa qarsy eriktiler Báıterek aýdany Şapov aýylynda salynyp jatqan mádenıet úıi qurylysyna monıtorıng júrgizdi.

QR Sybaılas jemqorlyqqa qarsy is-qımyl agenttigi BQO boıynsha departamentinen málim etkenindeı, klýb qurylysyna bıýdjetten 560 mln astam teńge qaralǵan.

«Nysannyń merdigeri – «Otdelstroı» qurylys-kommertsııalyq fırmasy» JShS. Tehnıkalyq qadaǵalaýdy «Turan Qurylys» JShS, avtorlyq qadaǵalaýdy «BS Stroı holdıng» JShS júzege asyrýda. Mádenıet úıiniń qurylysyn bıylǵy jeltoqsan aıynda aıaqtaý kózdelgen. Alaıda qurylys alańyndaǵy qazirgi jaǵdaı bul merzimniń buzylýy múmkin ekendigin kórsetip otyr. Monıtorıng nátıjeleri boıynsha eriktiler qurylys qarqynyn jyldamdatý jóninde usynystar jiberdi», - dep habarlady vedomstvodan.

«Mádenıet, óner jáne sportty qoldaý – memleket saıasatynyń basym baǵyttarynyń biri. Osyǵan baılanysty jetekshilik etetin organdar qurylys barysyn udaıy baqylap, problemalyq máseleler týyndaǵan jaǵdaıda tıisti sharalardy ýaqtyly qabyldaýǵa mindetti. Biz osy baǵyttaǵy jumysty aldaǵy ýaqytta da jalǵastyramyz», - deıdi eriktiler.

Báıterek aýdany ákiminiń orynbasary Murat Zalmuqanov atalmysh qurylysqa qajetti 271 mln teńgeni respýblıkalyq bıýdjetten bólý máselesi qarastyrylyp jatqanyn jetkizdi.

«Qarjy bólinse, mádenıet úıin ýaqytyly, sapaly salyp bitirýge tyrysamyz», - dedi Kazinform tilshisine «Otdelstroı» qurylys-kommertsııalyq fırmasy» JShS dırektory Valentına Mıhno.

Eske sala keteıik, budan buryn BQO aýyldarynda jańadan tórt Mádenıet úıi salynyp jatqanyn jazǵan bolatynbyz.