Batys Qazaqstanda mádenıet salasynyń úzdikteri marapattaldy
ORAL. KAZINFORM — Oral qalasyndaǵy «Atameken» óner ordasynda Mádenıet jáne óner qyzmetkerleri kúnine oraı saltanatty is-shara ótkizildi.
Jıynǵa Batys Qazaqstan oblysynyń ákimi Narıman Tóreǵalıev qatysyp, sala qyzmetkerlerin tól merekelerimen quttyqtady.
Onyń málim etkenindeı, oblys boıynsha mádenıet salasynda 6 myńǵa jýyq adam qyzmet etip jatyr.
Qasym-Jomart Toqaev Ulttyq quryltaıdyń ІÚ otyrysynda «Mádenıet pen óner — el ómirindegi óte mańyzdy sala. Óner — ulttyń jany, al mádenıet — rýhanı kelbeti. Bul qos qundylyqty órkenıetimizdiń ózegi deýge bolady. Ony saqtap, baıyta túsý — ortaq paryz» degen bolatyn.
— Memleket basshysy Aqordada ótken mádenıet pen óner salasy qyzmetkerleriniń saltanatty jıynynda elimizdegi irgeli mádenıet oshaqtary týraly sóz qozǵaı kele, Aq Jaıyq eliniń maqtanyshy Ǵarıfolla Qurmanǵalıev atyndaǵy oblystyq fılarmonııaǵa akademııalyq mártebe berý týraly pikirin bildirdi. Bul mekemeniń 60 jyldyq mereıtoıy qarsańynda memleket basshysy tarapynan berilgen úlken baǵa, Aq Jaıyq jurtyna saǵynyshpen jetken «aqjoltaı súıinshi» dep bilemiz, — dedi Narıman Tóreǵalıev.
Taǵy bir jaqsy jańalyq, Ǵ.Qurmanǵalıev atyndaǵy Batys Qazaqstan oblystyq fılarmonııasynyń solısi Jaskeleń Ǵaısaǵalıevke «Qazaqstannyń eńbek sińirgen qaıratkeri» qurmetti ataǵy berilse, «Jastar mádenıet saraıynyń» vokaldy-aspaptar ansambliniń solısi Omar Hıbashev «Eren eńbegi úshin» medalimen nagradtaldy.
Ákimniń sózine qaraǵanda, jyl saıyn memleket tarapynan mádenıet salasyna qoldaý kórsetilip, mádenıet mekemeleriniń ınfraqurylymyn damytý, materıaldyq-tehnıkalyq bazasyn jańartý jumysy turaqty istelip jatyr.
Ótken jyly Jańaqala, Bókeı ordasy, Kaztalov jáne Syrym, 4 aýdanda jańa mádenıet úıleri halyq ıgiligine paıdalanýǵa berildi. Tarıhı nysandar — Han ordasy mýzeı-qoryǵy quramyndaǵy Han saraıy (1828 jyly irge kótergen) men Qazynashylyq ǵımaraty (1867 jyl) eskertkishterine ǵylymı-restavratsııalyq jáne oblystyq halyq shyǵarmashylyǵy ortalyǵyna jóndeý jumysy júrgizildi.
Sáýir aıynda óńirdiń ónerin órge súırep, rýhyn asqaqtatatyn — jastar mádenıet saraıy kúrdeli jóndeýden ótkizilip, bazasynda shyǵarmashylyq baǵyttaǵy «Ozge Epic Oral creative hub» ashyldy.
Bıyl oblys boıynsha 11 nysannyń qurylysy men 7 nysannyń kúrdeli jóndeýi jáne 2 ǵylymı-restavratsııalyq jumystary qolǵa alynyp otyr.
Báıterek aýdany Şapov, Makarov, Kóshim aýyldyq klýbtary men Dostyq mádenı-sport kesheni, Syrym men Jánibek aýdandyq kitaphanalary, Aqjaıyq aýdany Kónekketken men Qabyrshaqty aýyldyq klýbtary, Qaratóbe aýdany Aqqozy aýyldyq klýby men Shóptikól aýylyndaǵy mádenı-sporttyq keshen, Jánibek aýdany Jaqsybaı aýyldaryndaǵy mádenı-sporttyq kesheniniń qurylys jumysy bastaldy.
A.Ostrovskıı atyndaǵy drama teatryna, Báıterek aýdanyndaǵy M.Sholohov mýzeıine, Bórli aýdany Keńtúbek, Býmakól, Jarsýat aýyldaryndaǵy mádenıet úılerine kúrdeli jóndeý jumysy, Han ordasy mýzeı-qoryǵy quramyndaǵy Han meshiti men Jáńgir han kesenesine ǵylymı-restavratsııalyq jumys júrgizilip jatyr.
H.Bókeeva atyndaǵy qazaq drama teatrynyń kúrdeli jóndeý jumystaryn bıyl maýsym aıynda bastaý josparlanyp otyr.
— Elimizde alǵash ret mádenıet salasynda «Qazaqstan halqyna» qorymen birlese 25 aýyldyq kitaphanany modernızatsııalaý boıynsha joba júzege asyrylyp jatyr. Búgingi kúni 25 kitaphananyń 16-sy ashyldy. Maýsym aıynyń sońyna deıin 9 aýyldyq kitaphana halyqqa paıdalanýǵa beriledi. Bul baǵyttaǵy jumys jalǵasady, — dedi óńir basshysy.
Saltanatty jıyn barysynda oblys ákimi Ǵ.Qurmanǵalıev atyndaǵy Batys Qazaqstan oblystyq fılarmonııasynyń solısi Jaskeleń Ǵaısaǵalıevke «Qazaqstannyń eńbek sińirgen qaıratkeri» ataǵyn tabys etti.
Qurylǵanyna 25 jyl tolýyna oraı Ǵ.Qurmanǵalıev atyndaǵy BQO fılarmonııasynyń Dáýletkereı atyndaǵy qazaq halyq aspaptary orkestri jáne otyz jyldyq belesti baǵyndyrǵan «Atameken» halyq bı ansambli Prezıdenttiń Qurmet gramotasymen marapattaldy.
Ǵ.Qurmanǵalıev atyndaǵy Batys Qazaqstan oblystyq fılarmonııasy «Atameken» vokaldy-kameralyq ansambliniń jetekshisi Kúnsulý Kóptileýova men Sh.Qajyǵalıev atyndaǵy estradalyq-sımfonııalyq orkestriniń kórkemdik jetekshisi Nıkıta Polognıýk Prezıdenttiń alǵys hatyna ıe boldy.
Sala ardagerleri Kárim Óteǵulov, Marat Bıgalıev, Qanatqalı Qojaqov, Lıýdmıla Sheveleva «Eńbek ardageri» medalin taqty.
Batys Qazaqstan oblysy ákiminiń alǵyshatymen marapattalǵandar qatarynda BQO tarıhı-mádenı muralardy qorǵaý jónindegi ınspektsııasynyń bólim meńgerýshisi Abzal Baıbekov, BQO zaǵıp jáne nashar kóretin azamattarǵa arnalǵan arnaýly kitaphanasynyń bas esepshisi Zámzagúl Jantýrınova, Han ordasy tarıhı-mádenı, arhıtektýralyq-etnografııalyq mýzeı-qoryǵynyń bólim basshysy Gúlmıra Elemesova, Báıterek aýdany Darııan aýyldyq mádenıet úıiniń bılettik kassıri Gúlnar Esenjanov bar.
Jumysshy mamandyǵy jylyna oraı tehnıkalyq qyzmetkerler de umyt qalmaı, barlyǵy 20 adamǵa qarjylaı sertıfıkattar berildi.
Bókeı ordasy aýdany mádenı-demalys ortalyǵynyń horeografy Sáýle Súndetova, Ǵ.Qurmanǵalıev atyndaǵy Batys Qazaqstan oblystyq fılarmonııanyń sýretshisi Qalel Qazıev jáne Shyńǵyrlaý aýdandyq mádenı-demalys ortalyǵynyń dırektory Saıyn Ájiǵalıev «Mádenıet salasynyń úzdigi» atandy.
Bir top qyzmetkerge basqa da marapattar tabys etildi.
— Elimiz boıynsha Mádenıet jáne óner qyzmetkerleriniń kúni keń kólemde atalyp ótilip jatyr. Áriptesterimiz búgin marapattar alyp, qýanyshqa keneldi. Meniń de kóp jylǵy eńbegimdi eskerip, «Eńbek ardageri» medalimen marapattady. Jasymyz kelse de, sahnadan túsken emespiz. Oǵan qosa Memleket basshysynyń Ǵarıfolla Qurmanǵalıev atyndaǵy oblystyq fılarmonııaǵa akademııalyq ataǵy beriletini jóninde aıtqany bizdi odan saıyn jigerlendirip, qanattandyryp otyr. Kópten kútken armanymyz edi, ol da oryndalmaqshy, — dedi Ǵ.Qurmanǵalıev atyndaǵy oblystyq fılarmonııanyń solısi, Qazaqstannyń eńbek sińirgen ártisi Qanatqalı Qojaqov.
Saltanatty is-shara kontserttik baǵdarlamaǵa ulasty.
Eske sala keteıik, budan buryn Prezıdent mádenıet salasyndaǵy bir top azamatty memlekettik nagradamen marapattaǵanyn jazǵan edik.