Batys Qazaqstanda Quryltaı saılaýyna oraı 2 myńǵa jýyq jas saılaýshy qosylmaq
ORAL. KAZINFORM — Batys Qazaqstan oblysynda búgingi tańda barlyǵy 673 saılaý komıssııasy bolsa, Quryltaı saılaýyna oraı sonyń 502-si jumys isteıdi.
BQO aýmaqtyq saılaý komıssııasynan málim etkenindeı, quramynda 3 224 komıssııa múshesi bar 14 aýmaqtyq (98 adam) jáne 488 ýchaskelik saılaý komıssııasy (3 126 adam) óz qyzmetin atqarady.
Komıssııa músheleriniń 94,9 paıyzynyń úlken saılaýlar ótkizý tájirıbesi bar. Komıssııa múshelerin oqytý jumystary josparly túrde júrgiziledi. Jańadan qosylǵan tájirıbesi joq komıssııa múshelerin tereńirek oqytýǵa nazar aýdarylatyn bolady. Oqytý kestesi jasaqtaldy. Oqytýdy tájirıbeli áriptester júrgizbekshi.
Quryltaı saılaýyn ázirleý men ótkizý jónindegi negizgi is-sharalardyń kúntizbelik jospary boıynsha 2026 jylǵy 7 shildede buqaralyq aqparat quraldarynda oblystyq jáne aýdandar men qalalyq aýmaqtyq saılaý komıssııalarynyń quramdary jarııalandy. 16 shildeden keshiktirmeı ýchaskelik saılaý komıssııalarynyń quramy men saılaý ýchaskeleriniń shekaralary jarııa etiledi.
Saılaýshylar tizimderi 2026 jylǵy 2 tamyzda ýchaskelik saılaý komıssııalaryna tıisti akt boıynsha usynylady (2026 jylǵy 1 shildedegi málimet boıynsha saılaýshylar sany — 452 307).
Sonymen qatar saılaýshylar tizimine 23 tamyzǵa deıin 18 jasqa tolatyn 1 934 jas saılaýshy qosylady. Bul jumys 30 shildege deıin júrgiziletin bolady.
Odan ári ýchaskelik saılaý komıssııalary 7 tamyzdan bastap saılaýshylar tizimderin tanysýǵa usynady. Osy sátten bastap saılaýshylar ýchaskelerge baryp, tizimder boıynsha ózi týraly derektermen tanysa alady.
Sondaı-aq 12 tamyzǵa deıin daýys berý ýaqyty men orny týraly azamattar habardar etiledi, ıaǵnı shaqyrý qaǵazdary úlestirilip, saılaýǵa qatysýǵa shaqyrylady.
BQO aýmaqtyq saılaý komıssııasynyń málimetine qaraǵanda, 488 ýchaskeniń 136-sy (27,9 paıyzy) oblys ortalyǵynda ornalasqan. Jyl basynan beri 2 jańa saılaý ýchaskesi qurylyp (Báıterek aýdany Asan aýylynda jáne Bórli aýdany Aqsaı qalasynda), saılaýshylar sany az 3 saılaý ýchaskesi (Bórli jáne Terekti aýdandarynda) jabyldy. Sáıkesinshe 15 saılaý ýchaskesiniń (Báıterek, Bórli, Terekti aýdandarynda jáne Oral qalasynda) shekaralary ózgertildi.
Ýchaskelerdiń 236-sy bilim berý mekemelerinde, 192-si mádenıet, 28-i densaýlyq saqtaý, 15-i sport nysandarynda, tórteýi áleýmettik mekemelerde jáne qalǵan 13-i ózge nysandarda ornalasqan.
Aýdandardaǵy aýmaqtyq saılaý komıssııalarynyń ornalasqan jerleri talapqa saı keledi.
Daýys berý kezinde erekshe jaǵdaılardy qajet etetin múgedektigi bar 2 324 adam (kreslo-arbalardy paıdalanatyndar — 574, kórýi boıynsha múgedekter — 1307, estýi boıynsha múgedektigi bar — 443) bar. Bul sanattaǵy saılaýshylarǵa daýys berýge jaǵdaılar jasalǵan, barlyq saılaý ýchaskeleri 1-qabatta ornalasqan. Oǵan qosa daýys berý kúni 55 ınvataksı, sýrdoaýdarmashylar qyzmeti uıymdastyrylady.
Ákimdikterdiń saıtyndaǵy «Saılaý» bóliminde «Quryltaı saılaýy» bólimi ashyldy. Onda saılaýǵa baılanysty barlyq materıal bar. Óńirde saılaýǵa yqylastyń joǵary ekendigin baıqaýǵa bolady. Óıtkeni aýmaqtyq saılaý komıssııasynyń resmı paraqshalarynyń qaralymy artty, saılaýǵa qatysty jeke suraqtarymen habarlasýshylardyń da sany kóbeıdi. Oblys boıynsha QR Ortalyq saılaý komıssııasynyń aqparattyq bılbord oryndarynyń sany — 215, jergilikti atqarýshy organdarmen birge úgit júrgizý oryndary — 498 jáne 316 kezdesý orny belgilengen. Sonymen qatar, LED ekrandar — 50, turǵyndarǵa qyzmet kórsetý mekemelerindegi teleekrandar — 24, radıo núkteler — 86. Bul oryndarda rolıkter men moýshndar kórsetilip jatyr.
Saılaýshylar sany kóp 199 ýchaskede azamattardy tirkeýdi tekserý boıynsha onlaın-servıs jáne 5 ýchaskede tirkeýde joq azamattardy tirkeý servısterin uıymdastyrý josparlanyp otyr.
Eske sala keteıik, budan buryn Túrkistan oblysynda Quryltaı saılaýynyń ashyqtyǵyn 32 qoǵamdyq birlestik baqylaıtynyn jazǵan edik.
