Batys Qazaqstanda quqyq buzýshylardan 5 myń danaǵa jýyq kıik múıizi tárkilendi

ORAL. KAZINFORM – Batys Qazaqstan oblysynda Oral popýlıatsııasyndaǵy kıikterdiń sany jyldan-jylǵa artyp keledi.

BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanovtyń óńirlik kommýnıkatsııalar qyzmeti alańynda ótken brıfıngte málim etkenindeı, bıyl kóktemde tóldeýge deıin ótkizilgen sanaq boıynsha kıikter sany 1 mln 620 myńǵa jetken. 

Nurlan Saǵyntaıulynyń sózine qaraǵanda, kıikti qorǵaýmen «Ohotzooprom» ÓB» RMQK Batys Qazaqstan fılıalynyń ınspektorlary aınalysady. Bul is-sharalarǵa 8 mobıldik top tartylsa, qazirgi tańda fılıalda 47 ınspektor, 20 avto-moto jáne qarshana tehnıkalary bar. 

Sońǵy jyldary kıik sanynyń kúrt ósip, sharýa qojalyqtarynyń shabyndyq, jaıylymdaryna jáne egistik alqaptaryna úlken zalal keltirip jatqany belgili. 

«Osy oraıda egistik jerlerdi kıikten qorǵaý maqsatynda oblysta jedel shtab qurylyp, jergilikti atqarýshy organdardyń qatysýymen birneshe ret keńes ótkizildi. «Ohotzooprom» mekemesi jáne «Bókeıorda» memlekettik tabıǵı rezervatynyń ınspektorlary sharýa qojalyqtarynyń egistikterin qorǵaý jumystaryna jumyldyryldy. Buǵan ózge óńirlerden qosymsha toptar tartyldy. Qazirgi tańda «Ohotzooprom» mekemesiniń shtat sanyn 112 adamǵa deıin ulǵaıtý jáne materıaldyq-tehnıkalyq jabdyqtarmen qamtamasyz etý jóninde QR Ekologııa jáne tabıǵı resýrstar mınıstrligimen tıisti sheshimder qabyldanyp jatyr», deıdi N.Rahymjanov.

Onyń aıtýynsha, QR Ekologııa jáne tabıǵı resýrstar mınıstri Erlan Nysanbaevtyń tamyz aıynda óńirge jumys sapary kezinde Jánibek aýdanynda Reseı Federatsııasy delegatsııasymen ótkizilgen keńeste shekara boıynsha qajetti jerlerge ekodálizder jasaý jóninde kelisilgen bolatyn. Bul joba júzege asqan jaǵdaıda kıikterdiń bir bóligi kórshi elge ótetin bolady. 

Inspektsııa basshysynyń málimdeýinshe, 2024 jyly oblysta janýarlar dúnıesin zańsyz alý jáne derıvattaryn ótkizý boıynsha 23 qylmystyq is tirkeldi.

«Kúni búginge deıin sotta 8 qylmystyq iske núkte qoıylyp, nátıjesinde 10 adam 2-7 jylǵa deıin bas bostandyǵynan aıyrý, shekteý jazalarymen jaýapkershilikke tartyldy. Qalǵan qylmystyq ister boıynsha tergeý jalǵasýda. Quqyq buzýshylardan 4 939 dana kıik múıizi tárkilendi. Bıyl sotta qaralǵan qylmystyq ister boıynsha 955 mln 305 myń teńge zalaldy óndirý talaby qanaǵattandyryldy», dedi N.Rahymjanov.

Eske sala keteıik, budan buryn Batys Qazaqstanda kıiktiń egistik alqaptaryna kirip ketip jatqanyn jazǵan bolatynbyz.