Batys Qazaqstanda qos qabatty jataqhananyń qulaǵaly turǵany ras pa
ORAL. KAZINFORM — Batys Qazaqstan oblysy Aqjaıyq aýdany ortalyǵy Chapaev aýylynda qos qabatty jataqhananyń qulaǵaly turǵany jóninde áleýmettik jelide beınejazba jarııalandy.
Qoǵam belsendisi Almagúl Iqsanovanyń málim etkenindeı, atalmysh úıde kópbalaly otbasylar, jalǵyz ilikti adamdar asa qaýipti jaǵdaıda turyp jatyr.
— Qos qabatty ǵımarattyń qabyrǵalary opyrylyp qulaǵaly tur. Adamdar úıindi astynda qalýy múmkin. Jataqhananyń ishi de sondaı, qabyrǵasy teńselip tur. Jertóleden sasyq ıis shyǵady, antısanıtarııa. Turǵyndarǵa naqty kómek kerek. Eger bul másele sheshilmese, kópbalaly otbasylarmen birge basqa da qadamdarǵa barýǵa májbúr bolamyn, — deıdi A.Iqsanova.
Turǵyndardyń sózine qaraǵanda, bári qulap jatyr, páterlerdi jóndeý múmkin emes, tóbeden tamshy aǵady. Úıge gaz tartylmaǵan. Jertóleden jylanǵa deıin shyqqan.
— Apatty úı dep taný úshin tehnıkalyq qorytyndy jasaýǵa 500 myń teńge jınap berýimiz kerek. Bizdiń ondaı qarjymyz joq, — deıdi turǵyndar.
Osyǵan oraı Kazinform tilshisi Aqjaıyq aýdany ákimdigine arnaıy saýal joldaǵan edi.
Aqjaıyq aýdanynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminen túsken málimetke qaraǵanda, Chapaev aýylyndaǵy Dostyq kóshesi, № 10-mekenjaıynda ornalasqan atalmysh turǵyn úı 1978 jyly salynǵan jáne bastapqyda 25 páterlik jataqhana bolǵan.
Búgingi tańda úıde 5 otbasy turady, qalǵan úı-jaılar bos (biriktirilgen). Bólmelerdiń bir bóligin turǵyndar satyp alyp, jeke turǵyn úı-jaılarǵa biriktirgen. 2022-2023 jyldary osy úıdi jóndeý (jańǵyrtý) úshin komıssııalyq tekserý júrgizildi. Tekserý barysynda úıdiń jóndeýge kelmeıtindigi jáne ony apatty dep taný qajet ekendigi anyqtaldy. Óıtkeni keıbir jerlerde páter ıeleri úıdiń qurylymdyq elementterin (negizgi qabyrǵalaryn) buzǵan.
— Osy jaǵdaı boıynsha úıdi apatty dep taný týraly tehnıkalyq qorytyndy berý úshin osy jumys túrlerin lıtsenzııasy bar jeke táýelsiz saraptama uıymdary júrgizetini týraly turǵyndarǵa túsindirildi. Alaıda saraptamalyq uıymdarda bul qyzmet aqyly bolǵandyqtan, turǵyndar tarapynan eshqandaı sharalar qabyldanǵan joq. Saraptama uıymdarynyń barlyq baılanys derekteri turǵyndarǵa berildi. Chapaev aýylynda halyqtyń áleýmettik osal toptary sanaty boıynsha 172 azamat turǵyn úı kezeginde tur. Al aýdanda 34 azamattyń jalǵyz turǵyn úıi apatty dep tanylǵan. Turǵyn úıdi bólý tártibi «Otbasy bank» AQ arqyly kezektilik tártibimen júrgiziledi, — delingen resmı jaýapta.
Eske sala keteıik, budan buryn Oralda tasqyn kezinde jaramsyz kúıge túsken 700 saıajaı úıi buzylmaı qalyp otyrǵanyn jazǵan bolatynbyz.
