Batys Qazaqstanda konservilengen kıik eti satylymǵa shyǵady

ORAL. KAZINFORM — Batys Qazaqstan oblysyndaǵy kásiporynda kıik etin konservilep satý úshin daıyndyq jumystary júrgizilip jatyr.

«Kýbleı» JShS dırektorynyń syrtqy ekonomıkalyq baılanystar jónindegi orynbasary Azamat Seıtbatalovtyń Kazinform tilshisine málim etkenindeı, kıik etinen konservi óndirýdiń óz joldary bar.

— Atap aıtqanda, aldymen ushalar súıekten ajyratylady. Sodan keıin et tazartylyp, sińiri de qalmaıdy. Sosyn et usaqtalyp, qosymsha ıngredıenttermen aralastyrylady. Bankilerge salynyp, germetıkalyq jabý, tańbalaý jáne etıket japsyrý jumysy júrgiziledi, — deıdi A.Seıtbatalov.

Azamat Orynbaıulynyń sózine qaraǵanda, aýyl sharýashylyǵy janýarlary, mysaly, iri qara malynyń etinen konservi jasaýmen salystyrǵanda, eleýli aıyrmashylyq joq. 

Biraq tekserýge kóp ýaqyt qajet. 

— Kúni búgin kásiporynda 250 tonnadan astam kıik eti jınaqtaldy. Aqbókenniń ishek-qarnyn, basqa da bólikterin, terisin paıdaǵa asyrý máselesine kelsek, mundaı jumys josparlanyp otyrǵan joq. Sonymen qatar kıik etinen jasalǵan konserviler tek ishki naryqqa ǵana jóneltiledi, — dep qosty A.Seıtbatalov. 

BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanovtyń naqtylaýynsha, kúni búginge deıin Batys Qazaqstan oblysynda 62,5 myń bas kıik aýlanǵan.

— Sonyń ishinde 54,5 myń bas aqbóken ushasyn óńirdegi et óńdeıtin kásiporyndar, 8 myń basty kórshiles Atyraý oblysyndaǵy «Batys KZ 25» JShS aldy. Biraq bizdiń oblystyń kásiporyndary da kıik etin basqa óńirlerge jóneltip jatyr, — deıdi N.Rahymjanov.

Eske sala keteıik, budan buryn Batys Qazaqstanda 30 myńdaı kıik aýlanǵanyn jazǵan edik. 

Sondaı-aq Aqtóbede kıik etine suranys joǵary ekendigi habarlandy.