Batys Qazaqstanda kóne kitap, qoljazbalardy jınaý qolǵa alyndy

ORAL. KAZINFORM — Batys Qazaqstan oblystyq tarıhı-ólketaný mýzeıiniń bastamasymen «Kóne kitaptar men qoljazbalar, fotosýretterdi jınaý» jobasy júzege asyryla bastady.

Mýzeı dırektory Jantas Safýllınniń Kazinform tilshisine málim etkenindeı, jobanyń maqsaty – tarıhı-mádenı mura bolyp sanalatyn kóne kitaptar men qoljazbalar, oǵan qosa fotosýretterdi jınaqtaý, saqtaý jáne zertteý. 

Jantas Nabıollaulynyń sózine qaraǵanda, qaǵaz qujattardyń merzimi shekteýli, ýaqyt óte kele tozady, jaramsyz bolyp qalady.

- Qazaqstan tarıhynda birneshe álipbı aýysqany málim. Qazirgi urpaq ata-babalarymyz qaldyrǵan kitap, qoljazbalardy oqı almaıdy. Biz sol muralardy jınastyryp, zerttep, qundy derekterdi ǵylymı aınalymǵa engizetin bolamyz. Bul jumystarmen oblystaǵy memlekettik 18 mýzeıdiń qyzmetkerleri aınalysady, - deıdi J.Safýllın. 

Onyń aıtýynsha, turǵyndar úılerindegi kóne kitap, qoljazba, fotosýretterdi mýzeıge tabys etip, elektrondy nusqasyn jasatyp ala alady. Eger tapsyrýǵa qımasa, mýzeı qyzmetkerleri elektrondy nusqasyn jasap alyp, túpnusqasyn ózderine qaıtarady. 

Bıyl ǵulama aqyn, oıshyl, Alash qaıratkeri, kezinde zertteýshiler «Abaıdan keıingi aqyn...» retinde baǵalaǵan Ǵumar Qarashtyń týǵanyna 150 jyl tolyp otyr. 

J.Safýllın ólketaný jumystarymen shuǵyldanyp, 2012 jyly Máskeý qalasyna baryp, aqynnyń nemeresi Nadejda Burhanqyzynan Ǵumar Qarashqa qatysty on shaqty papkany alǵan bolatyn. Іshinde zertteýshiler Mustafa Ysmaǵulov, Gúljaý Sultanǵalıeva jınaqtaǵan qujattar mol edi. Sonyń negizinde belgili jýrnalıst, ólketanýshy Qazybek Quttymuratulynyń kómegimen Ǵumar Qarashtyń alǵash ret úsh tomdyǵy basylyp shyqty. 

- Nadejda Burhanqyzy bizge úlken senim artyp, qujattardy paıdalanyp bolǵan soń jergilikti mýzeıge tapsyrarsyń dep amanat etken. Sonyń sáti túsip, papkalar men aqynnyń 1911 jyly jaryq kórgen «Órnek» atty kitabyn oblystyq mýzeı qoryna tapsyrdym. Qazirdiń ózinde bizdiń bastamamyzdy qoldap, mýzeıge qundy jádigerlerdi ákelip jatqandar bar. Jeńistiń 80 jyldyǵyna oraı Ekinshi dúnıejúzilik soǵys kezinde sarbazdardyń maıdannan jazǵan hattary da jınaqtalatyn bolady. Munyń mańyzdylyǵy sol, kóne kitap, qoljazbalar qur jatyp qalmaı, halyqtyń qajetine asyp, ǵalymdardyń zertteý nysanasyna aınalady, - dedi mýzeı dırektory. 

Eske sala keteıik, budan buryn Oralda aqyn Ǵumar Qarashtyń 150 jyldyǵyna arnalǵan músháıra máresine jetkenin jazǵan edik.