Batys Qazaqstanda kommýnaldyq jeliler 60 paıyzǵa tozǵan
ORAL. KAZINFORM – Batys Qazaqstan oblysynda Memleket basshysynyń kommýnaldyq qyzmetter sektorynyń ınvestıtsııalyq tartymdylyǵyn jaqsartý jónindegi tapsyrmasyna sáıkes «Tarıfti ınvestıtsııalarǵa aıyrbastaý» baǵdarlamasyn júzege asyrý baǵytynda birqatar is-sharalar atqarylýda.
QR Ulttyq ekonomıka mınıstrligi Tabıǵı monopolııalardy retteý komıteti BQO boıynsha departamentiniń basshysy Gúljaz Qazbekovanyń óńirlik kommýnıkatsııalar qyzmeti alańynda ótken brıfıngte málim etkenindeı, Qasym-Jomart Toqaev «Ádiletti memleket. Birtutas ult. Berekeli qoǵam» atty Qazaqstan halqyna Joldaýynda monopolııanyń paıdasyn shekteý qajettigi men ınfraqurylymǵa ınvestıtsııa salýdy qamtamasyz etý arasyndaǵy tepe-teńdikti saqtaý mańyzdy ekendigin atap kórsetken bolatyn. Prezıdent elimizde elektr qýatymen qamtamasyz etetin jelilerdiń úshten ekisiniń, jylý kommýnıkatsııasynyń 57 paıyzynyń jáne sý qubyry jelisiniń jartysyna jýyǵynyń tozyǵy jetkendigin, soǵan baılanysty monopolııaly naryqtarda «Tarıfti ınvestıtsııaǵa aıyrbastaý» degen jańa tarıf saıasatyna kóshý kerektigin aıtqan edi.
Gúljaz Jánibekqyzynyń sózine qaraǵanda, osy tapsyrmany oryndaý maqsatynda 2022 jylǵy 30 jeltoqsanda «Tarıfti ınvestıtsııaǵa aıyrbastaý» qaǵıdaty boıynsha tarıftik saıasatty jetildirý aıasynda «Tabıǵı monopolııalar týraly» QR Zańyna ózgerister engizilip, onda birqatar jańalyqtar belgilendi.
«Bıyl Batys Qazaqstan oblysynda kommýnaldyq qyzmetter tarıfiniń aıtarlyqtaı ósýi baıqalǵan joq. Óńirdegi tarıfter sońǵy jyldary ınflıatsııa ındeksiniń eń tómengi deńgeıinen asqan joq, bul shamamen 6-8 paıyz. Atap aıtqanda, 2023 jylmen salystyrǵanda, turǵyndar úshin jylytý baǵasy 6, sý 1,7, káriz 1,5, elektr qýaty 7,3, gazben qamtý 0,89 paıyzǵa artty», dedi G.Qazbekova.
Departament basshysynyń aıtýynsha, oblys boıynsha kommýnaldyq jeliler orta eseppen 60 paıyzǵa tozǵan. Sonyń ishinde Oral qalasynda jylýmen jabdyqtaý jelileri 50,4 (jylý-qýat ortalyǵy jabdyǵy 87,8 paıyz), sýmen qamtý jelileri 61,3, sý qubyrlaryn burý 60,48, elektr jelileri 80,67 paıyzǵa tozyp otyr.
Zańnamaǵa engizilgen ózgerister men «Tarıfti ınvestıtsııalarǵa aıyrbastaý» baǵdarlamasy tarıfterdiń, onyń ishinde ortasha baǵanyń ósýi esebinen ınjenerlik ınfraqurylymdardyń tozý deńgeıin tómendetýdi kózdeıdi.
«Osyǵan baılanysty ýákiletti organ tutynýshylar men tabıǵı monopolııalar sýbektileriniń múddelerin eskere otyryp, Prezıdent tapsyrmasyn júzege asyrý ádisterin ázirleýde. Nusqalardyń biri – ınvestıtsııa kólemin birneshe jylǵa, ıaǵnı 2030 jylǵa deıin tarıf quramyna bólshektep qosa otyryp, jelilerdiń tozý deńgeıin 15 paıyzǵa deıin tómendetý. Tarıftiń deńgeıi tabıǵı monopolııa sýbektisi usynǵan ótinimge baılanysty bolady, usynylǵan ótinim muqııat, jeke tártipte, jurtshylyq ókilderin, sarapshylardy jáne basqalardy qatystyra otyryp qaralady. Jalpy, tarıfter kezeń-kezeńmen kóteriletin bolady», deıdi G.Qazbekova.
Bul rette josparlanǵan tarıftiń quramyna atalǵan jelilerdiń tozýyn azaıtýǵa baǵyttalǵan ınvestıtsııalar ǵana emes, sonymen qatar tabıǵı monopolııa sýbektisi qyzmetkerleriniń jalaqysyn arttyrýǵa, sondaı-aq sýbektilerge balansqa berilgen jaǵdaıda ıesiz jelilerdi ustaýǵa jáne solarǵa qyzmet kórsetýge arnalǵan shyǵyndar da engiziledi.
«Bıyl kommýnaldyq jelilerdiń tozý deńgeıin tómendetý maqsatynda «Batys Qazaqstan aımaqtyq elektr jelilik kompanııasy» JShS-niń elektr energııasyn berý jáne bólý qyzmeti boıynsha 2024 jylǵa arnalyp bekitilgen 602,3 mln teńge mólsherindegi ınvestıtsııalyq baǵdarlamasy bıýdjet qarajaty esebinen 272,04 mln teńgege tolyqtyryldy. Osylaısha, jalpy somasy 874,4 mln teńgege ulǵaıtylyp, ózgerister engizilip, qaıta bekitildi. Sondaı-aq «Batys sý arnasy» JShS-niń sarqyndy sýdy burý jáne tazartý qyzmeti boıynsha bekitilgen 198,93 mln teńge kólemindegi ınvestıtsııalyq baǵdarlamasy bıýdjet esebinen 67,95 mln teńgege (jalpy somasy – 266,89 mln teńge) kóbeıtildi. Munyń bári jelilerdiń tozý deńgeıin tómendetý baǵytynda júzege asyrylýda», dedi G.Qazbekova.
