Batys Qazaqstanda kómilgen sibir jarasy oshaǵynan qaýip bar ma

ORAL. KAZINFORM — Batys Qazaqstan oblysynda barlyǵy 222 sibir jarasy oshaǵy tirkelgen. Qazirgi tańda bul kómilgen orynnan qaýip bar ma? Osyǵan oraı Kazinform tilshisi BQO veterınarııa basqarmasyna arnaıy saýal joldaǵan edi.

BQO veterınarııa basqarmasynan alynǵan málimetke qaraǵanda, sonyń ishinde Oral qalasynda 3 sibir jarasy kómilgen oshaq bolsa, onyń ekeýi — Jelaev, bireýi Derkól kenti aýmaǵynda ornalasqan. 

Bul oryndar memlekettik jer kadastry júıesine jáne topografııalyq kartaǵa engizilgen. 202 sibir jarasynyń oryny tolyq tsement-betondy materıalmen, 20-sy profıldi qańyltyrmen qorshalǵan. Kómilgen jerdiń bárine «Sibir jarasy» taqtaıshalary ornatylǵan.

— 2024 jyly qarasha aıynda Kaztalov aýdany Qoshankól aýyldyq okrýginiń Ordabaı aýylynda 1 bas iri qara malynan sibir jarasy aýrýy tirkeldi. Bıyl sibir jarasynyń oshaqtary anyqtalǵan joq, epızootııalyq jaǵdaı turaqty, — delingen resmı jaýapta. 

BQO sanıtarııalyq-epıdemıologııalyq baqylaý departamenti baspasóz qyzmetiniń naqtylaýynsha, ótken jyly Ordabaı aýylynda er adam iri qara maldy soıý kezinde aýrý juqtyrǵan. Naýqas qaladaǵy aýrýhanada em alyp, úıine qaıtaryldy.

— Epıdemıologııalyq tergeý barysynda naýqastyń iri qara maldy soıýǵa qatysqany anyqtaldy. Veterınarııalyq qyzmetkerlermen birlesip sanıtarııalyq-epıdemıologııalyq is-sharalar tolyq kólemde júrgizildi, — deıdi departament mamandary.

Bıyl bul indet óńirde tirkelgen joq.

Eske sala keteıik, budan buryn BQO-da aýyl turǵynynan sibir jarasy anyqtalǵanyn jazǵan edik.