Batys Qazaqstanda kókjótelmen aýyrǵandar sany 4,3 esege kóbeıdi

ORAL. KAZINFORM — Batys Qazaqstan oblysynda ótken jyly birqatar juqpaly dertke shaldyqqandar sany óskeni tirkeldi.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń málim etkenindeı, qyzylshamen 1 302 adam aýyryp, aldyńǵy jylǵydan (477) 2,7 esege asyp tústi.

Nurlybek Ermekulynyń sózine qaraǵanda, syrqattanǵandardyń 822-si nemese 63,1 paıyzy – 14 jasqa deıingi balalar, 164-i nemese 12,5 paıyzy – 1 jasqa deıingi sábıler. 796-sy nemese 61,1 paıyzy – ekpe saldyrmaǵandar.

- Sol sekildi kókjótelge shaldyqqandar 52-ge jetip, 2023 jylǵydan (12) 4,3 esege kóbeıip ketti. Munyń 51-i – 14 jasqa deıingiler, bireýi – eresek adam. Balalardyń 48-i nemese 92,3 paıyzy ekpe almaǵan. Degenmen bıylǵy qańtarda aýrýshańdyqtyń tómendegeni baıqalady. Qyzylshamen 2, kókjótelmen 3 adamnyń naýqastanǵany tirkeldi, - deıdi N.Mustaev.

Onyń aıtýynsha, 2024 jyly sondaı-aq epıdemııalyq parotıtpen 3 (2023 jyly – 0), menıngokokk juqpasymen 3 (2023 jyly – 1) adam aýyrǵan. 

- Jalpy, oblysta sanıtarııalyq-epıdemıologııalyq ahýal turaqty. Toptyq aýrýshańdyq derekteri bolǵan joq. Tyrysqaq, qutyrý, oba, ish súzegi, qyzamyq, dıfterııa, polıomıelıt, sirespe, bezgek jáne botýlızm jaǵdaılary tirkelmedi. Óńirde ótken jyly 15 juqpaly aýrýmen syrqattanǵandar sany azaıdy, - dedi N.Mustaev.

Eske sala keteıik, budan buryn BQO-da aýrý taratatyn tyshqan tárizdi kemirgishter sany 10 ese óskenin jazǵan bolatynbyz.