Batys Qazaqstanda kókjótelmen aýyrǵan 18 balanyń deni ekpe almaǵan

ORAL. KAZINFORM — Batys Qazaqstan oblysynda jyl basynan beri 18 balanyń kókjótelmen aýyrǵany zerthanalyq turǵyda rastaldy.

BQO sanıtarııalyq-epıdemıologııalyq baqylaý departamenti ınfektsııalyq jáne parazıttik aýrýlardy epıdemıologııalyq baqylaý bóliminiń basshysy Nazgúl Ájimuratovanyń málim etkenindeı, kókjótel eresekter arasynda tirkelgen joq. Aýrýdyń barlyǵy uıymdastyrylmaǵan balalarǵa qatysty bolyp otyr.

— Syrqattanǵan 18 balanyń 16-sy ekpe almaǵan. Sonyń ishinde tórteýiniń ata-anasy bas tartqan. Ekeýi medıtsınalyq qarsy kórsetilim sebebinen qamtylmaǵan. 10 balanyń vaktsına alýǵa jasy jetpegen. Kókjóteldiń kópshiligi Oral qalasynda, sondaı-aq Báıterek, Kaztalov, Bórli jáne Syrym aýdanynda kezdesip otyr, — dedi N.Ájimuratova.

Onyń aıtýynsha, kókjótel — kóbinese balalarda baıqalatyn, aýa-tamshy jolymen juǵatyn, jótel túrinde bilinetin jedel ınfektsııalyq aýrý. Adam aýyrǵan kezde tynys alý qyzmeti buzylyp, shyryshty qabyqtary zaqymdanady.

Kókjóteldiń belgileri joǵary tynys joldarynyń bakterııalyq ınfektsııasyna uqsas, dene qyzýy +38°S-qa deıin kóterilip, adam qaltyraıdy. Álsizdenip, bulshyq etteri syrqyrap, basy aýyrady. Murny bitelip, qurǵaq jótel paıda bolyp, shyryshty qabyǵy isinedi.

— Jótel ustamasy kezinde naýqas qınalyp, beti qyzaryp, qusyp, qatty qysylady jáne tynysy toqtap qalýy múmkin. Kókjótel qatty asqynǵan jaǵdaıda pnevmonııaǵa ulasýy yqtımal. Kókjóteldiń aldyn alýdyń jalǵyz ári tıimdi joly balalardy ektirý ekenin ata-analar umytpaýy kerek, — dedi maman.

Eske sala keteıik, budan buryn Batys Qazaqstanda 26 adamnyń brýtsellez juqtyrǵanyn jazǵan edik.