Batys Qazaqstanda kókjótelge shaldyqqan balalar sany 60-qa jýyqtady
ORAL. KAZINFORM – Batys Qazaqstan oblysynda bıylǵy segiz aıda 57 balanyń kókjótelmen aýyrǵany tirkeldi.
BQO sanıtarııalyq-epıdemıologııalyq baqylaý departamenti basshysy orynbasarynyń mindetin atqarýshy Mıra Qaýymbaevanyń Kazinform tilshisine málim etkenindeı, ótken jyldyń osy kezeńimen (9) salystyrǵanda, aýrýshańdyqtyń edáýir óskeni baıqalady.
Sonyń ishinde 30-y 1 jasqa jetpegen sábıler bolsa, 27-si – 1-den 14 jasqa deıingi balalar.
Mıra Nurlanqyzynyń sózine qaraǵanda, syrqattanǵandardyń basym bóligi nemese 42-si Oral qalasy, tórteýi Bórli, úsheýi Báıterek, eki-ekiden Aqjaıyq, Kaztalov, Shyńǵyrlaý, bir-birden Jańaqala men Terekti aýdanynyń úlesine tıedi.
- Kókjótel – tynys alý joldaryn zaqymdaıtyn, ásirese, balalar arasynda kezdesetin juqpaly aýrý. Onyń negizgi belgisi – uzaq ýaqytqa sozylatyn, ustamaly jótel. Kishkentaı balalarda aýrý asqynyp, tynys alýdyń qıyndaýyna ákelýi múmkin. Kókjóteldiń aldyn alýdyń eń tıimdi joly vaktsınatsııa ekendigin eske salamyz. Ulttyq profılaktıkalyq egý kúntizbesine sáıkes balalardy josparly ımmýndaýdan ýaqytyly ótkizý mańyzdy, - dedi M.Qaýymbaeva.
Onyń aıtýynsha, ata-analar balanyń densaýlyǵyna muqııat qaraǵany jón. Jótel uzaqqa sozylǵan jaǵdaıda ózdiginen em qoldanbaı, medıtsınalyq kómekke júginý qajet.
Eske sala keteıik, budan buryn Batys Qazaqstanda kókjótelmen aýyrǵan 18 balanyń deni ekpe almaǵanyn jazǵan edik.
