Batys Qazaqstanda kóktemde sý basý qaýpi bar 186 eldi meken tirkelgen

ORAL. KAZINFORM — Batys Qazaqstan oblysynda aldaǵy kóktemgi sý tasqynyna daıyndyq jumystary júrgizilýde.

BQO ákiminiń orynbasary Baqytjan Narymbetovtiń óńirlik kommýnıkatsııalar qyzmeti alańynda ótken brıfıngte málim etkenindeı, oblys boıynsha sý basý qaýpi bar 186 eldi meken tirkelgen. Bul aýyldarda 397 myńnan astam adam turady jáne 86 myńnan astam nysan ornalasqan.

Baqytjan Haberulynyń sózine qaraǵanda, sý tasqynyna qarsy sharalardyń arqasynda 186 eldi mekenniń 118-inde qaýip azaıtyldy.

«Daıyndyq barysynda ózenderdegi sý deńgeıine turaqty negizde monıtorıng júrgiziledi. Sý deńgeıiniń monıtorıngin damytý úshin oblys aýmaǵynda 22 gıdrologııalyq beket jumys jasaıdy. Qosymsha sý tasqyny kezeńine deıin 7 jańa gıdrobeket ashylady», deıdi B.Narymbetov.

Onyń aıtýynsha, sonymen qatar úsh úlken ózende (Jaıyq, Shaǵan, Derkól) jasandy ıntelektti qoldana otyryp, 3 avtomattandyrylǵan sý tasqyny qaýpin aldyn ala anyqtaý júıesi ornatylatyn bolady (joba quny – 99,5 mln teńge). Qazirgi ýaqytta memlekettik satyp alýda baıqaý jarııalandy.

«Oblystyń sý tasqyny qaýpi bar 2 ózeninde sanatsııa júrgizý josparlanýda. Atap aıtqanda, Derkól ózeni boıynsha Tasqala aýyly tusynda qurylys-montaj jumystary 600 mln teńgege baǵalanǵan joba memlekettik saraptamadan ótkizilýde. Shyńǵyrlaý ózeni boıynsha joba ázirlenýde. 11 shaqyrym qashyqtyqta jumysty iriktep júrgizý úshin 22 mln teńge bólindi», dedi B.Narymbetov.

BQO ákiminiń orynbasary keltirgen málimet boıynsha bıylǵy sý tasqynynyń saldarynan zardap shekken 5 927 úıge tehnıkalyq tekserý jumystary tolyqtaı júrgizildi.

Tehnıkalyq tekserý qorytyndylaryna sáıkes 1 343 turǵyn úı men saıajaı qurylystary jaramdy dep tanyldy. Al 2 828 baspana (Bórli aýdany – 129, Qaratóbe aýdany – 90, Syrym aýdany – 264, Terekti aýdany – 160, Báıterek aýdany – 12 úı, Oral qalasy – 2 285 saıajaı qurylysy) jaramsyz dep sheshildi.

Sý tasqynynan zardap shekken turǵyndarǵa bir rettik áleýmettik kómek (100 AEK – 4,7 mlrd), materıaldyq (150 AEK – 3,7 mlrd) jáne mal shyǵyny (151 mln teńge) tolyqtaı tólendi.

«Kúni búginge deıin shaǵyn jáne orta kásipkerlik sýbektilerinen 87 ótinim kelip tústi. Óńirlik komıssııa sonyń 85-in maquldady, bireýi qaıtaryldy, taǵy bireýi qaıta durystaýǵa jiberildi. Qazirgi tańda 55 ótinim boıynsha 3,2 mlrd teńge respýblıkalyq bıýdjetten tólense, 24 ótinim (60,2 mln) «Kúshimiz birlikte» qoǵamdyq birlestigi qory esebinen qanaǵattandyryldy. Turǵyn úılerdiń máselesi tolyqtaı sheshildi. ıAǵnı, 889 jańa turǵyn úı salynyp (aýdandarda – 438, Oral qalasynda - 451) jáne 1 939 baspana (aýdandarda – 105, Oral – 1 834) satyp alyndy. 1343 turǵyn úıdiń (aýdandarda – 865, Oral - 478) jóndelýine aqsha tolyqtaı berildi», dedi B.Narymbetov.

Eske sala keteıik, budan buryn Batys Qazaqstanda bıylǵydaı sý tasqyny qaıtalanýy múmkin be, sony jazǵan bolatynbyz.