BQO-da qyzylsha juqtyrǵandardyń 94 paıyzy - ekpe almaǵandar

Batys Qazaqstan oblysynda qyzylshamen aýyrǵandar sany kóbeıip otyr. Bul týraly oblys ákiminiń orynbasary Baqytjan Narymbetovtiń tóraǵalyq etýimen ótken óńirlik shtab otyrysynda aıtyldy, dep habarlaıdy Kazinform.

BQO sanıtarııalyq-epıdemıologııalyq baqylaý departamentiniń basshysy Muhamǵalı Aryspaevtyń málim etkenindeı, oblysta 20 qarashadaǵy málimet boıynsha qyzylshamen aýyrǵan 216 naýqas tirkeldi.

Onyń sózine qaraǵanda, bul 100 myń turǵynǵa shaqqanda, 31,2-den keledi. Aýyrǵandardyń basym bóligi nemese 68 paıyzy – balalar, 8,3 paıyzy – jasóspirimder, 23,6 paıyzy – eresekter.

Jıynda shtab tóraǵasy óńirde qyzylsha boıynsha epıdemıologııalyq jaǵdaıdy turaqtandyrý maqsatynda profılaktıkalyq jáne epıdemııaǵa qarsy is-sharalardy shıratýdy tapsyrdy.

Atalmysh departament málimeti boıynsha dert oblystyń barlyq aýdanynda anyqtalyp otyr. Biraq eń kóbi (136) Oral qalasynda jáne Bórli (31), Syrym (19) aýdandarynda tirkeldi.

Naýqastardyń 94 paıyzy – túrli sebeptermen ekpe almaǵandar, sonyń ishinde 34,9 paıyzy – ekpeden bas tartqandar, 18,3 paıyzy – medıtsınalyq kórsetilim boıynsha keıinge shegerilgender, 13,4 paıyzy – ekpe alý jasyna jetpegender.

«Qyzylshany emdeýdiń arnaıy jáne tıimdi emi joq. Qyzylshadan qorǵanýdyń jalǵyz tıimdi joly – vaktsınatsııa. Ulttyq egý kúntizbesine sáıkes 1 jasqa deıingi 9 255 sábı, 6 jastaǵy 9 744 bala josparly vaktsınatsııadan ótti. Vaktsınatsııa úshin qyzylshaǵa qarsy tıimdi ári qaýipsiz, qyzamyqqa jáne parotıtke qarsy komponentteri bar vaktsına (QQP) qoldanylady. Elimizdegi sııaqty, Batys Qazaqstan oblysynda da 7 qarashadan qyzylshaǵa qarsy qosymsha jappaı ımmýndaý bastaldy. Vaktsınatsııany 6 aıdan bastap 11 aıǵa deıingi balalar, 2, 3, 4 jastaǵy balalar alady. Sondaı-aq vaktsınatsııa mártebesi belgisiz adamdar úshin de júrgiziledi. Kúni búginge deıin 1 731 bala qyzylshaǵa qarsy ekpe aldy. Vaktsınatsııa odan ári jalǵasýda», - dep habarlady vedomstvodan.

Eske sala keteıik, budan buryn Batys Qazaqstanda qyzylsha dertine shaldyqqandar sany 155-ke jetkenin jazǵan bolatynbyz.