Batys Qazaqstanda qyzylshamen aýyrǵandar sany 100-den asty

ORAL. KAZINFORM – Batys Qazaqstan oblysynda jyl basynan beri 108 adam qyzylshamen syrqattandy.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde 25-i qańtar, 83-i aqpan aıynyń úlesine tıedi.

Nurlybek Ermekulynyń sózine qaraǵanda, aýrýshańdylyqtyń basym bóligi (84) Oral qalasynda anyqtalsa, 9-y Báıterek, 8-i Bórli, tórteýi Terekti aýdanynda, Kaztalov, Qaratóbe, Shyńǵyrlaýda bir-birden tirkelgen.

- Aýyrǵandardyń 29-y – 1 jasqa tolmaǵandar, 53-i – 1-4 jas, 16-sy – 5-14 jas aralyǵyndaǵylar, 10-y – 18-den asqandar. Ulttyq profılaktıkalyq egý kúntizbesine sáıkes qyzylshaǵa qarsy vaktsınatsııa balanyń 1 jáne 6 jasynda eki ret júrgiziletinin eske salamyz. Bul vaktsınatsııadan keıingi ımmýnıtetti qalyptastyrýǵa múmkindik beredi, ımmýnıtet vaktsınatsııalanǵan adamdarda ómir boıy bolady, - dedi N.Mustaev.

Onyń aıtýynsha, qyzylsha boıynsha epıdemıologııalyq jaǵdaıdy turaqtandyrý maqsatynda 2026 jylǵy 19 aqpanda QR Bas memlekettik sanıtarııalyq dárigeriniń –«Qazaqstan Respýblıkasynda qyzylsha boıynsha sanıtarııalyq-epıdemııaǵa qarsy jáne sanıtarııalyq-profılaktıkalyq is-sharalardy uıymdastyrý jáne ótkizý jónindegi sharalar týraly» № 3 qaýlysy kúshine endi.

Qaýlyǵa sáıkes qyzylshaǵa, qyzamyqqa jáne epıdemııalyq parotıtke qarsy ımmýndaý júrgizilip jatyr. Atap aıtqanda, 6 aıdan 10 aıǵa deıingi sábılerge 29 kún-epıdemıologııalyq jaǵdaı turaqtanǵanǵa deıin, Ulttyq profılaktıkalyq egý kúntizbesi aıasynda egilmegen 2-den 5 jasqa deıingi balalarǵa qosymsha jappaı ımmýndaý jasalyp jatyr. Sondaı-aq 7 jastan 18 jasqa deıingi, buryn vaktsınatsııalanbaǵan nemese 2023-2024 jyldardaǵy qosymsha jappaı ımmýndaýmen qamtylmaǵan balalar, vaktsınatsııalary nemese sol týraly málimetteri joq 30 jasqa deıingi medıtsına jáne densaýlyq saqtaý uıymdarynyń qyzmetkerleri egiledi.

Barlyq profılaktıkalyq egýler aqparattandyrylǵan kelisim alǵannan keıin ǵana júrgiziledi.

Departament basshysy orynbasarynyń málimdeýinshe, áskerı bólimderde sanıtarlyq-epıdemıologııalyq qaýipsizdikti qamtamasyz etý maqsatynda qosymsha sharalar qabyldandy.

Eń aldymen áskerı bólimderge kelgennen keıin qyzylshamen aýyratyn naýqastarmen baılanysta bolǵan, aýrý belgileri bar nemese ınfektsııa oshaqtarynan kelgen áskerıler 21 kúntizbelik kún merzimge mindetti túrde oqshaýlanýǵa jatady. Bul aýrýdyń yqtımal jaǵdaılaryn ýaqtyly anyqtaýǵa jáne ınfektsııanyń odan ári taralýyn boldyrmaýǵa múmkindik beredi.

Budan basqa, Ulttyq profılaktıkalyq egý kúntizbesine sáıkes vaktsınatsııa bolǵan kezde ǵana jastar áskerı jáne arnaýly oqý oryndaryna qabyldanady.

Balalardy qyzylshadan qorǵaý úshin bilim berý uıymdarynda sharalar qabyldandy. Balabaqshalarda toptaǵy balalar jalpy sanynyń 90 paıyzynan tómen emes deńgeıde profılaktıkalyq egýlermen qamtylady. Bul ujymdyq ımmýnıtetti qalyptastyrý jáne barlyq tárbıelenýshilerdi qorǵaý úshin qajet.

Mektepter men balabaqshalarda kún saıyn tańerteńgi súzgini ótkizý arqyly JRVI nemese qyzylsha belgileri barlardy sabaqqa jibermeý úshin balalar men qyzmetkerler tekseriledi.

Balabaqshada nemese mektepte qyzylsha aýrýy tirkelgen jaǵdaıda naýqaspen qarym-qatynasta bolǵan ekpemen qamtylmaǵan balalar medıtsınalyq baqylaý kezeńinde mekemege barýdan ýaqytsha shettetiledi.

Densaýlyq saqtaý salasynda qyzylsha boıynsha epıdemıologııalyq jaǵdaıdy turaqtandyrý boıynsha júıeli sharalar kesheni júzege asyrylýda.

Naýqaspen qarym qatynasta bolǵan 30 jasqa deıingi adamdarǵa 72 saǵat ishinde shuǵyl vaktsınatsııalaý jáne olardy 21 táýlik boıy kúndelikti medıtsınalyq baqylaý júrgiziledi. Aýrýhanaishilik ınfektsııany boldyrmaý úshin medıtsınalyq uıymdarda sanıtarııalyq-epıdemıologııalyq rejım kúsheıtildi.

Egý jáne kóshpeli brıgadalardyń daıyndyǵy, sýyq tizbektiń saqtalýy, vaktsınatsııa pýnktterin qajetti preparattarmen qamtý, sondaı-aq medıtsınalyq qaldyqtardyń durys kádege jaratylýyn baqylaý qamtamasyz etildi.

- Qyzylshaǵa qarsy ekpeniń qujattamalyq rastamasy (júrgizilgen vaktsınatsııa týraly málimetter) bolǵan kezde balalar josparly emdeýge jatqyzylady. Bul shara aýrýhanaishilik ınfektsııanyń taralý qaýpine jol bermeý jáne statsıonar jaǵdaıynda qyzylshanyń aldyn alý maqsatynda engizildi, - dep qosty N.Mustaev.

Eske sala keteıik, budan buryn Oralda qyzylshamen aýyrǵan balalardyń barlyǵy ekpe almaǵanyn jazǵan bolatynbyz.