Batys Qazaqstanda qyzylshamen aýyrǵandar sany 100-den asty
Batys Qazaqstan oblysynda bıyl 119 adamnyń qyzylshamen aýyrǵany zerthanalyq túrde rastaldy, dep habarlaıdy Kazinform.
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda málim etkenindeı, atalǵan dert Aqjaıyq, Bórli, Báıterek, Syrym, Kaztalov, Qaratóbe, Tasqala, Terekti, Shyńǵyrlaý aýdandary men Oral qalasynda tirkeldi.
Onyń sózine qaraǵanda, naýqastardyń kópshiligi – densaýlyǵyna baılanysty ekpe almaǵan balalar jáne ekpe alý merzimi áli kelmegen bir jasqa deıingi bóbekter, sondaı-aq ata-anasy ekpeden bas tartqandar.
Sonyń ishinde 18-i – bir jasqa deıingiler, 63-i – 1-14 jas aralyǵyndaǵylar, 38-i – eresek turǵyndar.
Taǵy bir aıta ketetin jaıt, mektepterde 17, balabaqshalarda 13 derek tirkeldi.
Qazirgi kezde aýrý oshaqtarynda epıdemııaǵa qarsy is-sharalar kesheni júrgizilýde. Atap aıtqanda, 21 kún boıy baılanysta bolǵan adamdarǵa baqylaý ornatyldy, oǵan qosa epıdemıologııalyq kórsetilim boıynsha ekpe salyndy.
«QR Bas memlekettik sanıtarlyq dárigeriniń qaýlysy negizinde qyzylshaǵa qatysty kúrdeli epıdemıologııalyq jaǵdaıdy eskere otyryp, 6 qarashadan birneshe kezeńnen turatyn qosymsha jappaı ımmýndaý júrgizý naýqany bastaldy. Qosymsha jappaı ımmýndaý 6 aıdan 10 aı 29 kúnge deıingi, sondaı-aq 2 men 4 jas 11 aı 29 kún aralyǵyndaǵy balalardy qamtıdy. Óıtkeni osy jastaǵylar qyzylshamen kóp aýyrady. Derttiń alǵashqy belgileri baıqalǵanda, turǵyndar ózdiginen emdelmeı, birden medıtsınalyq kómekke júginýi qajet», - dedi N.Mustaev.
BQO densaýlyq saqtaý basqarmasy basshysynyń orynbasary Aınash Ǵubaıdýllınanyń naqtylaýynsha, barlyǵy 183 adamda qyzylsha aýrýy kúdikti jaǵdaı retinde tirkelip, sonyń 119-y rastalǵan.
«Naýqastardyń 102-si nemese 85,7 paıyzy – ekpe almaǵandar. Jyl basynan beri statsıonarǵa jatqyzylǵan 133 adamnyń 99-y jazylyp shyqty. Kúni búgin 35 adam emdelip jatsa, sonyń 27-si – balalar (1 jasqa deıingileri – 2), 8-i – eresek adamdar. Olardyń jaǵdaıy ortasha aýyr. Sonymen qatar aýrý jeńil ótip jatqan 17 adam ambýlatorlyq em alýda, bulardyń bireýi – júkti áıel», - dedi A.Ǵubaıdýllına.
Eske sala keteıik, budan buryn Batys Qazaqstanda qazan aıynda 13 myńnan astam adamnyń JRVI-men aýyrǵanyn jazǵan bolatynbyz.
