Batys Qazaqstanda qyzylsha juqtyrǵandar sany 170-ke jýyqtady

ORAL. KAZINFORM – Batys Qazaqstan oblysynda jyl basynan beri 169 adam qyzylshamen aýyrsa, sonyń 25-i qańtar, 83-i aqpan aıynda, 61-i 1-18 naýryz aralyǵynda tirkelgen.

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń ishinde Oral qalasynda 126, Báıterek aýdanynda 14, Bórlide 10, Terektide 9, Kaztalovta 3, Jańaqala, Qaratóbe, Syrymda eki-ekiden, Shyńǵyrlaýda 1 adam syrqattanǵan. 

Nurlybek Ermekulynyń sózine qaraǵanda, naýqastardyń 50-i 1 jasqa tolmaǵan. 75-i – 1-4, 16-sy 5-14 jas aralyǵyndaǵylar, 28-i – 18 jas jáne odan joǵarylar. 

Aýyrǵandardyń 154-i nemese 91,1 paıyzy ekpe almaǵan. Sonyń ishinde 41-i vaktsınatsııadan bas tartqan. 49-y medıtsınalyq qarsy kórsetilimderge baılanysty egilmegen. 47-si ekpe jasyna tolmaǵan. –iniń vaktsınatsııa alǵan-almaǵany belgisiz. Sondaı-aq 113-i – uıymdastyrylmaǵan topqa kiretinder, 20-sy – balabaqsha tárbıelenýshileri, 17-si – mektep oqýshylary, tórteýi – JOO stýdentteri, 13-i – jumyssyzdar. 

- Qyzylsha aýrýy bastapqy kezeńde qarapaıym sýyq tıgen sııaqty kórinýi múmkin bolǵandyqtan, dárigerge ýaqtyly barý kerek. Jiti respıratorlyq aýrý belgileri bar balalardy mektepke deıingi balalar uıymdaryna, mektepterge jiberýdiń qajeti joq, - dedi N.Mustaev.

BQO densaýlyq saqtaý basqarmasy basshysynyń orynbasary Aınash Ǵubaıdýllınanyń naqtylaýynsha, oblystyq juqpaly aýrýlar aýrýhanasynda qyzylshamen aýyrǵandarǵa arnalǵan 60 kereýet qarastyrylǵan. Kúni búgin 34 naýqas em alyp jatsa, sonyń 28-i – balalar, altaýy – eresek adamdar.

- Qyzylshamen aýyrǵannan keıin aýyr asqynýlardyń biri panentsefalıt ekenin atap ótkim keledi. Panentsefalıt – bul mı tinderiniń aýyr zaqymdanýymen sıpattalatyn sırek, biraq óte qaýipti asqyný. Ol kóbine qyzylshamen aýyrǵannan keıin 5-10 jyldan keıin damýy múmkin. Bul asqyný ortalyq júıke júıesiniń zaqymdalýyna ákelip, nevrologııalyq buzylystarmen, aqyl-oı qabiletiniń tómendeýimen jáne keıbir jaǵdaılarda ólimmen aıaqtalýy múmkin. Bıyl 11 jastaǵy baladan panentsefalıt aýrýy anyqtaldv (ol 9 aılyǵynda qyzylshamen aýyrǵan). Sondyqtan vaktsınatsııa – ómirdi saqtaıtyn jalǵyz tıimdi shara, - dedi A.Ǵubaıdýllına. 

Qazirgi kezge deıin oblysta 6-10 aılyq aralyǵyndaǵy 1 626 sábı ekpe aldy, qamtý kórsetkishi – 49,1 paıyz. 

Eske sala keteıik, budan buryn Batys Qazaqstanda qyzylshamen aýyrǵandar sany 100-den asqanyn jazǵan bolatynbyz.