Batys Qazaqstanda qyzylsha dertine shaldyqqandar sany 155-ke jetti

Batys Qazaqstan oblysynda qyzylsha dertine shaldyqqandar sany 155-ke jetti, dep habarlaıdy Kazinform.

BQO sanıtarııalyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń 103-i nemese 66,4 paıyzy – 14 jasqa deıingiler, 13-i (8,3 paıyzy) – jasóspirimder, 39-y (25,1 paıyzy) – eresek adamdar.

Onyń sózine qaraǵanda, qyzylsha, ásirese, Oral qalasynda (96), sondaı-aq Bórli aýdanynda (21), Syrymda (15) kóbirek kezdesip otyr. Qalǵan aýdandarda sırek ushyrasady. Al Bókeı ordasy, Jańaqala, Jánibek aýdandarynda tirkelgen joq.

Departament basshysynyń aıtýynsha, ujymdarda 48 derek tirkelse, sonyń 26-sy mektepterde, 22-si balabaqshalarda oryn aldy. Sondaı-aq 10 stýdent qyzylsha juqtyrdy.

«Aýyrǵandarmen qarym-qatynasta bolǵan 1 914 adamǵa medıtsınalyq baqylaý júrgizilýde, epıdemıologııalyq kórsetkishter boıynsha ekpe salynýda. Naýqastar – 1 jasqa deıingi sábıler, ekpeden bas tartqandar, medıtsınalyq qarama-qarsy kórsetkishter sebebinen ekpe almaǵandar jáne egý týraly málimeti belgisiz eresekter. Ókinishke qaraı, qazirgi ýaqytta qyzylsha dertine shaldyqqandarmen baılanysta bolǵan balalardyń ata-analary arasynda da, sondaı-aq 30 jasqa deıingiler arasynda da epıdemıologııalyq kórsetkishter boıynsha ekpeden bas tartyp jatqandar bar. Qyzylsha derekteriniń 58,7 paıyzdan astamy 5 jasqa deıingilerdiń úlesine tıedi. Kúni búgin 6 qarashadan beri qosymsha ekpe alýǵa tıisti 3 669 balanyń 1 122-si nemese 31 paıyzy egildi. Vaktsınatsııa jalǵasatyn bolady», dedi M.Aryspaev.

Eske sala keteıik, budan buryn Batys Qazaqstanda qyzylshamen aýyrǵandar sany 100-den asqanyn jazǵan bolatynbyz.