Batys Qazaqstanda kıikterdiń malǵa aýrý taratyp jatqany ras pa
ORAL. KAZINFORM — Batys Qazaqstan oblysynda aýrý kıikterdiń dalada júrgendigi týraly áleýmettik jelide beınejazba tarady.
Turǵyndardyń sózine qaraǵanda, Kaztalov aýdany Qaraoba aýyly mańynda kıikterdiń erni jara, aýzynan silekeı aǵyp júr. Birqatar beınejazbada basqa da aýyldarda ólgen kıikter túsirilgen.
– Jánibek aýdany Aqoba, Kúıgenkól aýyldyq okrýgterinde mal aýzynan silekeı, kóbik aǵyp, kóptep aýyryp jatyr. Olardyń bári de – egilgen mal. Soǵan qaramastan, kıikten juqtyrǵandyqtan, osyndaı keselge ushyrady. Veterınarlar maldyń aýyz qýysyn emdep jatyr, – deıdi turǵyn.
Osyǵan oraı Kazinform tilshisi BQO orman sharýashylyǵy jáne janýarlar dúnıesi aýmaqtyq ınspektsııasyna arnaıy saýal joldady.
Basshynyń mindetin ýaqytsha atqarýshy Qaırat Qadeshevtiń málim etkenindeı, beınetaspaǵa túsirilgen kıikten veterınarlyq qyzmet synama alǵan.
– Synamany asa qaýipti aýrýdyń bar-joqtyǵyn anyqtaý úshin «Veterınarııa boıynsha ulttyq referenttik ortalyq» RMK-ǵa joldaıdy. Naqty qorytyndysy keıin belgili bolady, – dedi Q.Qadeshev.
Onyń aıtýynsha, jyl basynan beri tabıǵı jaǵdaıda ólgen 2 199 bas kıiktiń ushalary jınalyp, órteý ádisimen joıyldy.
Batys Qazaqstan ınnovatsııalyq-tehnologııalyq ýnıversıtetiniń professory, veterınarııa ǵylymdarynyń doktory Ǵaısa Ábsatırov Qazaqstanmen shektesetin memleketter aýmaǵynda asa qaýipti aýrýlar boıynsha epızootııalyq jaǵdaıdyń kúrdelenýine baılanysty bul máseleniń óte ózekti ekendigin jetkizdi.
Ǵalymnyń pikirinshe, kórshiles elderdiń ulttyq veterınarııa qyzmetteri kelisilmegen áreketke, atap aıtqanda, aýsyldyń aıqyn belgileri bar maldy Qazaqstan aýmaǵy arqyly tasymaldaýǵa baryp jatyr. Buǵan QR AShM Veterınarııalyq baqylaý jáne qadaǵalaý komıtetiniń shekaradaǵy mamandary tarapynan tosqaýyl qoıylyp ta jatyr.
– Qazirgi tańda Batys Qazaqstan oblysynda aqbókenderdiń mekendeý jáne kóship-qoný aımaǵynda kıikter arasynda aýsyldyń kórinisteri tirkelip otyr. Kıiktiń bir táýlik ishinde uzaq qashyqtyqtyqtarǵa bara alatyndyǵyn eskersek, bul mal sharýashylyǵy úshin úlken qaýip týǵyzady. Sondyqtan QR AShM Veterınarııalyq baqylaý jáne qadaǵalaý komıteti mamandardyń oqıǵa oryn alǵan jerlerge baryp, epızootııaǵa qarsy is-sharalardy shuǵyl uıymdastyrýy qajet, – dedi Ǵ.Ábsatırov.
Eske sala keteıik, budan buryn Batys Qazaqstanda qansha kıik aýlanǵanyn jazdyq.
