Batys Qazaqstanda kıikterdiń egistikke túsip jatqany ras pa

Jánibek aýdany Jaqsybaı aýyldyq okrýgi «Nurjan» sharýa qojalyǵynyń basshysy Súıinǵalı Rahmetovtiń málim etkenindeı, kıiktiń sheti joq.

- Kún saıyn jaǵdaı osy. Ekken eńbegimiz esh ketti, bárin jep boldy. Alqapty qorshaýǵa dál qazirgi sátte múmkindigimiz joq, - deıdi S.Rahmetov.

Atalǵan sharýa qojalyǵy 50 gektar jerge sýdan shóbin ekken.

Bókeı ordasy aýdany Bórli aýylynyń turǵyny, «Sısenǵalıev R.A.» sharýa qojalyǵynyń basshysy Isataı Sısenǵalıevtiń málimdeýinshe, mıllıondaǵan kıik tehnıkamen qaıyrýǵa kúsh bermeıdi.

- Egistik alqabyn tek tormen qorshap, qorǵanbasaq, basqa amal joq. Al tormen qorshaý óte qymbatqa túsedi. Ár sharýanyń jaǵdaıy kótermeıdi. Bul erteń úlken talas-tartysqa soqtyrýy múmkin. Eńbegi esh ketip, eginin kıik otap ketse, árıne, sharýa ashynady. Sondyqtan áýeli qorshap almaı, eshteńe ekpegen jón. Kıik jan-jaqqa qashyp, aıdaýǵa kónbeıdi, qaıtyp kelip turady. Basymnan ótken soń aıtyp turmyn, - deıdi I.Sısenǵalıev.

Osy máselege oraı Kazinform tilshisi BQO orman sharýashylyǵy jáne janýarlar dúnıesi aýmaqtyq ınspektsııasyna jolyqqan edi.

Inspektsııa basshysy Nurlan Rahymjanovtyń sózine qaraǵanda, oblys boıynsha kıikterdiń egistikke túsý derekteri tirkelgen joq.

- Barlyq egistikterdiń qasynda 36 top kúzetý jumystaryn atqarýda. Atap aıtqanda, Kaztalov aýdanynda 11 (1 686 gektar), Jańaqalada 2 (370 ga), Jánibekte 23 (4 177 ga) jáne Bókeı ordasynda 2 (300 ga) sharýa qojalyǵynyń jerleri qorǵalýda. Sharýalar negizinen sýdan men jońyshqa ekken, - dedi N.Rahymjanov.

Onyń aıtýynsha, bıylǵy kıik sanaǵynyń qorytyndysy áli shyqqan joq. Qazirgi ýaqytta tóldeý aıaqtaldy. Aqbókenderdiń kópshiligi Jánibek pen Kaztalov aýdanynda shoǵyrlanǵan.

Inspektsııa málimetine sáıkes jyl basynan beri Batys Qazaqstan oblysynda 18 190 bas kıik óleksesi joıyldy.

Eske sala keteıik, budan buryn BQO-da aýrýdan maly shyǵynǵa ushyraǵan sharýalar ótemaqy ala ma, sony jazǵan edik.