Batys Qazaqstanda kıik sanyn retteý jumysy qalaı júrgizilip jatyr
ORAL. KAZINFORM – Batys Qazaqstan oblysynda bıylǵy kóktemde tóldegenge deıin 2,3 mln bas kıik sanaqqa ilikti.
BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanovtyń málim etkenindeı, bıyl sonyń 20 paıyzyn nemese 460 myń bas kıikti aýlaý kózdelip otyr. Onyń sózine qaraǵanda, kıik sanyn retteý jumystary búgin bastaldy. Bul is-sharalar «Ohotzooprom» ÓB» RMQK kúshimen atqarylady.
- Qazirgi tańda Tasqala, Báıterek aýdandarynda 4 brıgada jumystanýda. Buǵan qyryq shaqty adam, 12 tehnıka tartylǵan. Búgin tańnan bastap kıiktiń tekeleri atylyp jatyr. Qyrkúıek aıynda koral ádisimen aýlaý qosylady. Bul naýqan 1 jeltoqsanǵa deıin sozylady, - dedi N.Rahymjanov.
BQO orman sharýashylyǵy jáne janýarlar dúnıesi aýmaqtyq ınspektsııasynyń málimeti boıynsha Batys Qazaqstan oblysynda kıikti retteý jumysy 2023 jyly júrgizilgen edi. Eki jyl buryn tek 29 myń aqbóken aýlanǵan bolatyn.
BQO ákiminiń orynbasary Qalııar Aıtmuhambetovtiń aıtýynsha, kúni búgin oblys aýmaǵynda jalpy qýattylyǵy táýligine 1 900 bas kıik soıa alatyn, syıymdylyǵy 440 tonna tońazytqysh kamerasymen jabdyqtalǵan 7 et óńdeý kásiporny («Kýbleı» JShS, «Batys-Nyq» JShS, «Kaırov» JK, «Jalpaqtal» AShÓK, «Jeńis» JK, «Isaev» JK, «Amangeldi» JK) anyqtalyp otyr.
- Budan bólek, «Atameken Syrym» AShÓK jáne «Amangeldi» JK-men kelissózder júrgizilip jatyr. Oǵan qosa táýligine 1 950 bas kıik etin óndiretin tórt kásiporyn («FartOıl» JShS, «Kýbeev» JK, «ID Mıras» JShS, «Batys - kıik» JShS) salynady dep josparlanǵan, - dedi Q.Aıtmuhambetov.
Onyń naqtylaýynsha, kıik sanyn retteý boıynsha oblysqa 4 brıgada kelip, ázirlik jumystaryn júrgizdi. Retteý jumystaryn 3 shildede saǵat 00.00-de 2 brıgada Tasqala aýdanynda bastady. Alaıda nátıje bolmaǵandyqtan, Báıterek aýdanyna kóshirildi. Buǵan «Kýbleı» JShS et óndeý kásiporny bekitildi. Taǵy 2 brıgada Aqjaıyq aýdanynan Báıterekke aýystyryldy (Oǵan «Batys-Nyq» JShS bekitildi).
Jalpy, óńirde kıik sanyn retteý máselesi boıynsha oblystyq shtab qurylǵan. Shtab jumysy 2025-2027 jyldarǵa arnalǵan ózara is-qımyl shemasyna sáıkes júrgizilip jatyr. Jyl basynan beri 1 736 bas kıik óleksesi mal molalarynda órteý ádisimen joıyldy. Bul jumystar áli de jalǵasyp jatyr.
- Algorıtmge sáıkes jergilikti atqarýshy organdarǵa júktelgen tapsyrma negizinde kıik sanyn retteý kezinde ólekselerdi kómý oryndary aıqyndalyp, arnaıy orynǵa shyǵarý úshin tehnıkalar (tirkemeli traktor, ekskavator, qajetti janar-jaǵar maı) bólindi. Kıik sanyn retteý máselesi úzdiksiz protsess ekeni anyq. Qazirgi kezde kıik ólekseleri aýyl sharýashylyǵy janýarlaryna arnalǵan mal molalaryna shyǵarylyp jatyr. Olardyń orny tolýyna baılanysty kıik ólekselerin shyǵarý úshin arnaıy mola salý qajettiligi týyndap otyr, - dedi oblys ákiminiń orynbasary.
Eske sala keteıik, budan buryn kıikten zardap shekken fermerlerge ótemaqy tólene me, sony jazǵan edik.