Batys Qazaqstanda kıik etteri tórt kombınatqa jóneltilip jatyr
Batys Qazaqstan oblysynda soıylǵan kıik etteri tórt kombınatqa jóneltilip jatyr, dep habarlaıdy Kazinform.
BQO orman sharýashylyǵy jáne janýarlar dúnıesin qorǵaý aýmaqtyq ınspektsııasynyń basshysy Nurlan Rahymjanovtyń aıtýynsha, qazirgi kezde kıikter Jańaqala men Kaztalov aýdandarynda aýlanyp, soıylýda.
«Kúni búgin 1700-den astam bas kıik soıylyp, etteri Jańaqala aýdanyndaǵy «Sáýletov», Kaztalov aýdany Jalpaqtal aýylyndaǵy «Jalpaqtal», Oralǵa qarasty Krýgloozernyı kentindegi «Kýbeev» JK jáne Atyraý qalasyndaǵy «Asyl-Agro» kompanııasyna jóneltildi. Kombınattar etti tońazytqyshta saqtap, halyqqa satady. Sońǵy kezde Krýgloozernyıdaǵy ǵımarattyń buryn avtokólik jýý nysany bolǵany jóninde áńgime aıtylýda. Buǵan qatysty mynadaı túsinikteme bergim keledi. Buryn sondaı nysan bolǵanymen, keıin ishin qaıta jasaqtap, veterınarlyq talapqa sáıkestendirip, tıisti qujattaryn alǵan», dedi N.Rahymjanov.
«Ohotzooprom» ÓB» RMQK Batys Qazaqstan óńirlik fılıalynyń dırektory Arman Qojahmetov kıik ushalarynyń et kombınattaryna jiberilip jatqanyn aıtyp, 21 qazan kúni jańbyrǵa baılanysty bul jumystyń ýaqytsha toqtaǵanyn habarlady.
Eske sala keteıik, budan buryn BQO-da kıikti ustap, etin halyqqa satýǵa ruqsat etilgenin jazǵan bolatynbyz.
