Batys Qazaqstanda kıik etin óńdeý keshenin salý kózdelip otyr
ORAL. KAZINFORM — Batys Qazaqstan oblysynda kıik eti men onyń derıvattaryn óńdeý úshin ınvestıtsııa tartylmaqshy.
BQO aýyl sharýashylyǵy basqarmasy basshysynyń orynbasary Rústem Zulqashevtiń málim etkenindeı, kúni búginge deıin oblys kóleminde 90,7 myń kıik aýlandy.
Rústem Múlkáıulynyń sózine qaraǵanda, kıikti qabyldaý úshin 15 soıý nysany bekitilgen. Sonyń ishinde «Kýbleı» JShS ǵana kıik etin óńdemekshi. Munyń jetkiliksiz ekendigi túsinikti.
Osy maqsatta bıyl BQO ákiminiń Qytaı Halyq Respýblıkasyna sapary kezinde kıik etin jáne derıvattaryn óńdeýde birlesken ınvestıtsııalyq jobalardy júzege asyrý baǵytynda birqatar kelissóz júrgizildi. Sonyń barysynda «Kıik derıvattaryn qaıta óńdeý jobasy» boıynsha QHR-nyń Cheng Tıan Ran Keng Farmatsetıkal (Chang Tian Run Kang Medical Limited) kompanııasy men Batys Qazaqstan oblysynyń ákimdigi arasynda ózara túsinistik týraly memorandýmǵa qol qoıyldy.
— Budan keıin kompanııa ókilderi óńirimizge kelip, Kaztalov nemese Aqjaıyq aýdany aýmaǵynda kıik eti men derıvattaryn óńdeý úshin et óńdeý kesheni qurylysyn salýdy josparlady. Soǵan sáıkes 7 mln eýro kóleminde ınvestıtsııa tartylsa, keshen qýattylyǵy aýysymyna 2 myń bas kıik etin óńdeýge jetetin bolady. Qurylysty 2026 jyldyń 1 sáýirinde bastap, 2027 jyly 1 qazanda aıaqtaý kózdelýde. Keshende kıik etin óńdeý, et-súıek unyn, aqýyz untaǵyn óndirý, kıik múıizinen dárilik zattar óndirý qolǵa alynbaq. Sonymen qatar aqbókendi aýlamaıtyn mezgilde sıyr, jylqy, qoı sııaqty aýyl sharýashylyǵy janýarlarynyń etin de óńdemekshi, — dedi R.Zulqashev.
Eske sala keteıik, budan buryn Batys Qazaqstanda aýlanǵan kıik sany 85 myńǵa jýyqtaǵanyn jazǵan edik.