Batys Qazaqstanda kıik egistik alqaptaryna kirip ketip jatyr

ORAL. KAZINFORM – Batys Qazaqstan oblysynda kıikter egistik alqaptaryna da kirip ketip jatyr.

Tasqala aýdandyq kásipkerlik jáne aýyl sharýashylyǵy bóliminiń basshysy Samıǵolla Shúkirovtiń málim etkenindeı, Mereı aýyldyq okrýginde «Birlik +» sharýa qojalyǵynyń 460 gektar egis alqabyna kúnine 30-50 bas kıik keledi.

Onyń sózine qaraǵanda, Dostyq aýyldyq okrýginde «Karen» sharýa qojalyǵynyń 330 gektar bıdaı alqabyna da kıik túsip jatyr.

«Aýdan boıynsha bes aýyldyq okrýg egin egedi. Kıikter eginge ótken jyly túsip, tapaǵan edi. Bıyl da solaı. Sonymen qatar Qazaqstan, Shejin, Mereke aýyldyq okrýgteriniń shabyndyq-jaıylymdarynda, Jaıyqbaı kanaly boıynda 300-500-deı kıik júr. Bıyl shóp qoıý bolǵanymen, alasa. Ony da kıik jep jatyr», dedi S.Shúkirov.

Kıik negizinen BQO-nyń Jánibek, Kaztalov, Bókeı ordasy, Jańaqala aýdandaryn kóbirek mekendeıdi. Bókeı ordasy aýdanynyń ákimi Nurlybek Daýmovtyń aıtýynsha, jaǵdaı bıyl kúrdeli.

«Qystan mal aryq shyqty. Shyǵyn da barshylyq. Sharýa qojalyqtary ótken jyldardan qalǵan mal azyǵy qoryn taýysty. Bıyl eki aıdan beri jańbyr jaýǵan joq, shóptiń shyǵymy nashar. Onyń ústine kıik kóbeıip, malmen birge jaıylyp júr. Qazirgi kezde aýdannan tysqary jerlerden mal azyǵyn jınaý máselesi qarastyrylyp jatyr. Oǵan qosa osyǵan baılanysty aýdanda tótenshe jaǵdaı jarııalaý kerektigi týraly usynys túsip jatyr», - dedi N.Daýmov.

BQO orman sharýashylyǵy jáne janýarlar dúnıesin qorǵaý jónindegi aýmaqtyq ınspektsııasynyń basshysy Nurlan Rahymjanov kóktemgi áýe sanaǵynyń qorytyndysy boıynsha Oral popýlıatsııasyndaǵy kıikterdiń sany 1 mln 620 myń basqa jetkenin málimdedi.

Áıtse de, bul esepke kıiktiń bıylǵy tólderi kirmegen. Atalǵan aýdandar turǵyndary men sharýa qojalyqtarynyń ókilderi kıik sany budan da kóp ekenin aıtady.

Eske sala keteıik, budan buryn Batys Qazaqstanda kıikterdiń kóbeıýi sharýa qojalyqtaryn alańdatyp otyrǵanyn jazǵan bolatynbyz.