Batys Qazaqstanda keıingi úsh jylda týý kórsetkishi ósken

ORAL. KAZINFORM — Batys Qazaqstan oblysynda ótken jyly 14 013 sábı jaryq dúnıe esigin ashty.

BQO ádilet departamenti basshysynyń orynbasary Estaı Rashqalıevtiń málim etkenindeı, bul 2023 jyldaǵydan (11 917) 2 096 nárestege kóp.

Estaı Eltaıulynyń sózine qaraǵanda, sońǵy úsh jylda týý kórsetkishiniń óskeni baıqalady.

— Sonymen qatar, 2024 jyly 4 519 (2023 jyly — 4 897) neke qıylǵan. Al 1 172 neke (2023 jyly — 2 039) ekeýara kelisimmen buzylǵan. Ótken jyly 5 648 adam ómirden ótken, bul 2023 jylǵydan (4 587) 1 061-ge kóp bolyp otyr, — deıdi departament basshysynyń orynbasary.

Onyń aıtýynsha, azamattyq hal aktilerin tirkeý salasy boıynsha reformalar, sonyń ishinde AHAJ-dy tsıfrlandyrý jalǵasýda.

— Bul rette ádilet organdary atalǵan sala boıynsha taldaý jáne monıtorıng júrgizý, azamattyq hal aktilerin tirkeýdi normatıvtik-ádisnamalyq qamtamasyz etý, baqylaý jáne tıisti derekqordyń jumys isteýin qamtamasyz etýdi júzege asyrady. Osyǵan oraı QR Premer-mınıstriniń 2024 jylǵy 29 shildedegi halyqty memlekettik qoldaý sharalarynyń tıimdiligin arttyrý máseleleri boıynsha tapsyrmasyn oryndaý maqsatynda BQO ádilet departamenti oblystyń múddeli organdarymen birlese otyryp, otbasy tsıfrlyq kartasynyń derekterin ózektendirý jumystaryn atqarýda, — dedi E.Rashqalıev.

Eske sala keteıik, budan buryn Batys Qazaqstanda 430 boryshkerdiń ákimshilik qamaqqa alynǵanyn jazǵan bolatynbyz.