Batys Qazaqstanda kene shaqqan adamdar sany 160-tan asty
ORAL. KAZINFORM – Batys Qazaqstan oblysynda jyl basynan beri kene shaqqan 163 adam medıtsınalyq kómekke júgindi.
BQO Sanıtarııalyq-epıdemıologııalyq baqylaý departamenti basshysynyń orynbasary Gúldana Kereevanyń málim etkenindeı, ótken jyly osy merzimde 166 adamdy kene shaqqan edi. Bul kórsetkishter kene shaǵýynyń aldyn alý sharalaryn qatań saqtaýdyń mańyzdylyǵyn kórsetedi.
Onyń sózine qaraǵanda, kóktem-jaz mezgilinde kenelerdiń belsendiligi edáýir artady. Keneler adam densaýlyǵyna qaýipti juqpaly aýrýlardyń, sonyń ishinde Kongo-Qyrym gemorragııalyq qyzbasynyń qozdyrǵyshtaryn tasymaldaýy múmkin.
- Kene shaǵýynyń aldyn alý úshin tabıǵat aıasynda demalǵanda jáne dalada jumys istegende, ashyq tústi, deneni tolyq jabatyn kıim kııý, arnaıy repellentter qoldaný jáne kıim men deneni únemi tekserip otyrý usynylady. Úıge oralǵannan keıin keneniń bar-joǵyna kóz jetkizip, adam ózin, balalaryn, jaqyn-jýyqtaryn, sondaı-aq úı janýarlaryn muqııat qarap shyǵý qajet, - deıdi G.Kereeva.
Mamannyń aıtýynsha, eger denege kene jabysyp qalsa, adam ony óz betinshe alyp tastaýǵa tyryspaǵan abzal. Múmkindiginshe tez arada medıtsınalyq uıymǵa júginip, dárigerden bilikti kómek alǵan jón.
Eske sala keteıik, budan buryn BQO-da qyzylshamen aýyrǵan 270-ten astam adamnyń basym bóligi ekpe almaǵanyn jazǵan edik.
