Batys Qazaqstanda qazan aıynda 13 myńnan astam adam JRVI-men aýyrǵan
Batys Qazaqstan oblysynda qazan aıynyń basynan beri 13 myńnan astam adam jiti respıratorlyq vırýstyq ınfektsııamen aýyrǵan, dep habarlaıdy Kazinform.
BQO sanıtarııalyq-epıdemıologııalyq baqylaý departamentiniń basshysy Muhamǵalı Aryspaevtyń aıtýynsha, bul ótken jylǵy osy kezdegiden 64 paıyzǵa kóp.
Muhamǵalı Qaıyrjanulynyń sózine qaraǵanda, syrqattanǵandardyń 65,5 paıyzy – 14 jasqa deıingi balalar. Sonyń ishinde bir jasqa tolmaǵan 164 sábı vırýsty juqtyrǵan. Sondaı-aq 29 júkti áıel atalmysh dertke shaldyqty.
Departament basshysynyń pikirinshe, tumaý vırýsyn juqtyrý, ásirese, egde jastaǵy adamdarda, júkti áıelder men balalarda aýyr zardapqa soqtyrý múmkin. Sondyqtan munyń aldyn alýdyń qaýipsiz ári tıimdi sharasy – vaktsınatsııa. Tumaýǵa qarsy egý 1 qazannan ambýlatorııalyq-emhanalyq kómek kórsetetin barlyq medıtsınalyq mekemede bastaldy. Epıdemııalyq maýsymǵa Reseı Federatsııasynda óndirilgen tumaýǵa qarsy «Grıppol+» vaktsınasynyń 138 myń dozasy satyp alyndy.
«Táýekel tobyna eń aldymen medıtsına qyzmetkerleri, emdeý mekemelerinde esepte turǵan jáne jıi aýyratyn balalar, balalar men qarttar úıiniń tárbıelenýshileri, sozylmaly syrqaty barlar, júkti áıelder, mektep oqýshylary, joǵary jáne arnaýly orta oqý oryndarynyń stýdentteri men sonda jumys isteıtinder jatady. Kúni búginge deıin osy topqa jatatyndardyń 53,7 paıyzy (74 849 adam) tumaýǵa qarsy egildi. Tumaýdan saqtaný úshin adamdar kóp jınalatyn jerlerde betperdeni qoldanǵan jón. Túshkirý nemese jótel sııaqty aýrý belgileri bar adamdarmen qarym-qatynas jasamaý kerek. Qoldy sabynmen jaqsylap jýý respıratorlyq ınfektsııalar sanyn 25 paıyzǵa azaıtýǵa múmkindik beredi. Budan basqa da saqtyq sharalaryn umytpaý qajet», - dedi M.Aryspaev.
Eske sala keteıik, budan buryn Batys Qazaqstanda qyzylshamen mektep oqýshylary da aýyryp jatyrǵanyn jazǵan bolatynbyz.