Batys Qazaqstanda kásipkerdiń sút baǵasyn asyryp satqany belgili boldy
ORAL. KAZINFORM — BQO saýda jáne tutynýshylardyń quqyqtaryn qorǵaý departamenti kásipkerlik nysanynyń sútti ústeme baǵasynan asyryp satqanyn anyqtady.
Departament basshysy Elmıra Qımatovanyń málim etkenindeı, bıylǵy qańtar aıynan bastap áleýmettik mańyzy bar azyq-túlik taýarlarynyń tizbesi 19-dan 31-ge deıin keńeıtilgeni belgili.
Onyń sózine qaraǵanda, buryn atalǵan tizbede jumsaq qaptamadaǵy maılylyǵy 2,5 paıyz pasterlengen sút bolǵan edi. Qazirgi qoldanystaǵy tizbege dámdik qospalary joq (laktozasyzdan basqa), maılylyǵy 2-den 6 paıyzǵa deıingi pasterlengen, ýltrapasterlengen, sterıldengen sút engizilgen.
«Saýda qyzmetin retteý týraly» QR Zańynyń 9-babyna sáıkes atalmysh tizbedegi azyq-túlik taýaryn ótkizý kezindegi shekti saýda ústemesiniń mólsheri óndirýshiniń bosatý nemese kóterme jetkizýshiniń satyp alý baǵasynan 15 paıyzdan aspaýy tıis.
- Alaıda bul talapty saýda nysandarynyń bári birdeı saqtaı bermeıdi. Máselen, kompanııalardyń biriniń saýda jelilerine, bólshek saýdada ótkizýshiler (úı mańyndaǵy dúkender) men kóterme saýdagerlerge maılyǵy 3,2 jáne 6 paıyz «Býrnenskoe súti» taýaryn saýda ústemesinen asyryp jetkizgeni anyqtaldy. Atap aıtqanda, maılylyǵy 3,2 paıyz sút 23,4-ten 86,8 paıyzǵa deıingi saýda ústemesimen satylǵan. Al maılylyǵy 6 paıyz sút 44,6-dan 95,2 paıyzǵa deıin jetken, - dedi E.Qımatova.
Departament basshysynyń aıtýynsha, osyǵan baılanysty atalǵan kásipkerlik nysany QR Ákimshilik quqyq buzýshylyq týraly kodeksiniń 204-4-babyna sáıkes jaýapkershilikke tartylyp, oǵan aıyppul salyndy.
Eske sala keteıik, budan buryn Oralda ımporttyq jumyrtqany zańsyz satý derekteri anyqtalǵanyn jazǵan edik.
