Batys Qazaqstanda qar sýy aýylǵa kireberis joldy shaıyp ketti
ORAL. KAZINFORM – Batys Qazaqstan oblysy Terekti aýdanynda Tóńkeris aýylyna kireberis joldy qar sýynyń shaıyp ketkeni jóninde áleýmettik jelide beınejazba jarııalandy.
Turǵyndardyń sózine qaraǵanda, olar mundaı tasqynnyń bolý múmkin ekendigi týraly aldyn ala dabyl kóterip, aýdan ákimdigine hat joldaǵan. Endi joldy sý basqannan keıin TJ qyzmetine de habarlasqan.
Osy máselege oraı Kazinform tilshisi Terekti aýdany ákimdigine arnaıy saýal joldaǵan edi.
Aýdan ákimi apparatynan túsken málimetke qaraǵanda, atalǵan aýdandyq mańyzy bar joldy jóndeý men sý ótkizetin qubyrlar ornatýǵa joba jasalǵan.
Ótken jyly 28 tamyzda bıýdjetten qarjy bólingennen keıin birden konkýrstyq rásimder júrgizilgen. Sonyń qorytyndysyna sáıkes 24 qyrkúıekte «ASFA» JShS-men 39 mln 965,1 myń teńgege (2025 jylǵa – 1 myń teńge, qalǵany – 2026 jylǵa) kelisim-shart jasalǵan. Keıin qosymsha kelisim-shartqa da qol qoıylǵan. 10 qazanda avanstyń 30 paıyzy – 11 mln 989,8 myń teńge tólengen.
Ákimdiktiń habarlaýynsha, jer jumystaryn júrgizý úshin qolaısyz aýa raıynyń týyndaýyna baılanysty merdiger uıymnyń jazbalaı haty negizinde qurylys-montaj jumystary toqtatyldy. 12 jeltoqsanda qarjy kólemin azaıtýǵa qosymsha kelisim-shart jasalyp, nysan boıynsha mindettemeler 2026 jyldyń sońyna deıin uzartyldy.
- Qazirgi tańda jaǵdaı qalypty, kezekshilik uıymdastyryldy. Kólik qatynasy úzilgen joq. Alaıda kóktemgi jaısyzdyqqa baılanysty trassanyń uzyna boıynda kólik qatynasy qıyndady. Joba boıynsha jóndeý jumystary qolaıly aýa raıy qalyptasqannan keıin júrgiziledi, - delingen resmı jaýapta.
Dolın aýyldyq okrýgine qarasty Tóńkeris eldi mekeninde 156 úı, 3 áleýmettik nysan bar, 388 adam turady.
Eske sala keteıik, budan buryn Batys Qazaqstanda erigen qar sýy joldyń ústine shyǵyp ketkenin jazǵan edik.
Sondaı-aq Batys Qazaqstanda qar kúrt erip, joldy buzyp ketti.
BQO-da Shaǵan jáne Derkól ózenderinde sý deńgeıi kóterilip jatqany habarlandy.
