Batys Qazaqstanda qandaı jylý nysandary jańartylyp jatyr

ORAL. KAZINFORM – Batys Qazaqstan oblysynda bıyl 6 jylýmen jabdyqtaý jobasyn júzege asyrýǵa respýblıkalyq jáne jergilikti bıýdjetten 5,2 mlrd teńge bólindi. 

BQO energetıka, turǵyn úı-kommýnaldyq sharýashylyq basqarmasy basshysynyń mindetin atqarýshy Beıimbet Mýsınniń málim etkenindeı, sonyń ishinde № 18A káriz-sorǵy stantsııasy, № 2 jylý magıstrali, Krýgloozernyı jáne sanmektep qazandyqtaryn rekonstrýktsııalaý jumystaryn jylytý maýsymyna deıin aıaqtaý kózdelip otyr.

Beıimbet Málikulynyń sózine qaraǵanda, Oral jer asty sýlary ken ornynyń sý jınaý qurylystary jáne dıametri 1 myń mm sý qubyrlaryn qaıta jańartý, ıaǵnı eki joba 2026 jylǵa aýysady. 

– Bul nysandar ótken ǵasyrdyń 60-70 jyldary paıdalanýǵa berilip, sodan beri kúrdeli jóndeýden ótpegen. Bólingen qarajat Oral qalasynda 200 myńǵa jýyq abonentti, balabaqshalar, mektepter, kolledjder, aýrýhanalar men emhanalardy jylýmen, sý jáne sý burýmen úzdiksiz qamtamasyz etýge múmkindik beredi, - deıdi B.Mýsın. 

Onyń aıtýynsha, sonymen qatar «Jaıyqjylýqýat» AQ-nyń óz qarajaty esebinen Oral qalasynyń jylý-qýat ortalyǵynda 4 negizgi jabdyq (№ 2 energetıkalyq qazandyǵy, № 11 sý jylytqysh qazandyǵy, № 2,3 týrbınalary) jáne 5,5 km jylý jelilerine kúrdeli jáne aǵymdaǵy jóndeý jumystaryn júrgizý josparlanǵan. Kúni búgin bul jumystar 80 paıyzǵa aıaqtaldy.

Sol sekildi «Batys sý arnasy» JShS esebinen 593 mln teńgege 7,8 km sý qubyry men káriz jelilerin kúrdeli jáne aǵymdaǵy jóndeý jumystary júrgizilýde. Oǵan qosa «Batys Qazaqstan aımaqtyq elektr jelilik kompanııasy» JShS 1,2 mlrd teńgege elektr jelileri men qosalqy stantsııalardy retke keltirip jatyr.

– Kúni búgin oblys boıynsha 1 422 áleýmettik nysan men 2 041 turǵyn úı bolsa, sonyń 85 paıyzy jylytý maýsymyna daıyn, - dep qosty B.Mýsın.

Eske sala keteıik, budan buryn Oralda jylý qubyrynyń jóndelýine baılanysty 11 mekeme ystyq sýdan ajyratylǵanyn jazǵan edik.