Batys Qazaqstanda ıgerilmegen 119 myń gektar aýyl sharýashylyǵy jeri memleketke qaıtaryldy
Batys Qazaqstan oblysynda sybaılas jemqorlyq táýekelderine syrtqy taldaý júrgizý nátıjesinde ıgerilmegen 119 myń gektar 121 aýyl sharýashylyǵy jer telimi jergilikti atqarýshy organdardyń aralasýymen memleketke qaıtaryldy, dep habarlaıdy QazAqparat tilshisi.
QR Sybaılas jemqorlyqqa qarsy is-qımyl agenttigi BQO boıynsha departamentiniń basshysy Ádilhan Sabýrovtyń málim etkenindeı, Batys Qazaqstan agroónerkásiptik óńir bolǵandyqtan, aýyl sharýashylyǵy jerleriniń tapshylyǵy týraly habarlama kóptep túsedi.
Onyń sózine qaraǵanda, departament sybaılas jemqorlyqtyń aldyn alýǵa erekshe mán beredi. Osy oraıda óńirdiń erekshelikteri eskerile otyryp, jeti mańyzdy baǵyt aıqyndalǵan. Atap aıtqanda, jer qatynastary, joldar men ınfraqurylym, ekologııa, aýyl sharýashylyǵy, medıtsına, bilim berý, sondaı-aq bıznesti qorǵaý máseleleri.
Departament basshysynyń aıtýynsha, sybaılas jemqorlyqqa qarsy monıtorıng júrgizý aıasynda 248 jer teliminiń zańsyz berilgeni anyqtaldy. Soǵan oraı qaýlylardyń kúshin joıý týraly nusqamalar berildi.
Sol sekildi Terekti aýdany ákimdigi 1014 azamatqa jeke turǵyn úı qurylysy úshin gaz jáne elektrmen jabdyqtalmaǵan jer bergen. Departamenttiń usynysymen jobalyq-smetalyq qujattama ázirlenip, kommýnıkatsııalar júrgizý jumystary bastaldy.
Sondaı-aq departamenttiń usynysymen ákimdiktiń jerdi jalǵa berýden (uzartýdan) bas tartý týraly, keıinnen jer paıdalanýshylardyń paıdasyna jańa quqyqtyq aktiler shyǵarýdan bas tartý týraly 9 qaýlysynyń kúshi joıyldy.
Oǵan qosa energııa berýshi uıym elektr qýatyn paıdalaný erejesin buza otyryp, bıznes nysandarynan tehnıkalyq sharttar alýdy zańsyz talap etken. Bul tájirıbe toqtatyldy.
Halyqqa aýyzsýdy sýbsıdııalaý salasynda da kemshilikter anyqtalyp, memleketke 108 mln astam teńge zalal keltirilgen. Qazirgi ýaqytta atalǵan qarjy kólemin óteý boıynsha sharalar qabyldandy.
Departament sonymen qatar sybaılas jemqorlyqqa qarsy volonterlarmen birlesip, 37 myń turǵyny bar 52 eldi meken úshin sý qunyn arzandatýǵa sýbsıdııa bermeý derekterin anyqtady.
Atap aıtqanda, Batys Qazaqstan oblysynyń aýyzsýmen jabdyqtaýdyń balamasyz kózderi bolyp tabylatyn sýmen jabdyqtaýdyń erekshe mańyzdy oqshaý júıeleriniń tizbesine 52 eldi mekenniń jergilikti sý qubyrlary engizilmegen, sonyń saldarynan turǵyndar aýyzsýdy sýbsıdııalaý múmkindiginen aıyrylǵan. Mysaly, Terekti aýdanynyń birqatar aýyldarynda sýdyń quny 643 teńgeni qurap otyr. Kúni búgin 3 myńnan astam turǵyny bar 5 eldi mekendegi sý qubyrlary sýmen jabdyqtaýdyń erekshe mańyzdy oqshaý júıeleriniń tizbesine engizildi.
Aldaǵy ýaqytta aýyzsýdy sýbsıdııalaý múmkindigi qarastyrylatyn bolady. Qalǵan eldi mekenderdegi sý qubyrlary boıynsha jergilikti atqarýshy organdar tarapynan tıisti jumystar atqarylýda.
«Agenttik jyl basynan beri «Bızneske jol» jobasyn júzege asyrýda. Búgingi tańda biz 400-den astam kásipkerdiń jer qatynastary, baqylaý jáne qadaǵalaý, ınfraqurylym, ákimshilik tájirıbe, memlekettik satyp alý, aýyl sharýashylyǵy, memlekettik múlikti basqarý, ekologııa salalary boıynsha problemalyq máselelerin sheshtik. Máselen, bilim berý salasynda memlekettik satyp alý týraly sharttardy oryndaý merzimderin zańsyz qysqartý derekteri belgili boldy. Qyryqtan astam bilim berý uıymdary 180 bıznes nysanymen memlekettik satyp alý týraly sharttar jasasqan kezde kúntizbelik on bes kúnnen az merzim kórsetip, kásipkerlerdiń quqyǵyn shektegen. Budan basqa Oral qalasynyń bilim berý bólimi jeke kásipkerlerge 30 bilim berý uıymynda týrnıketter ornatý úshin tótenshe jaǵdaılar jónindegi organmen kelisý túrindegi mindetti negizsiz júktegen. Bul kelisim kásipkerler úshin qosymsha ýaqytty talap etti, saldarynan jekelegen mektepterge taýarlar ýaqtyly jetkizilmeı, turaqsyzdyq aıyby qoıyldy. Qoryta aıtqanda, azamattar sybaılas jemqorlyq derekteri boıynsha Sybaılas jemqorlyqqa qarsy qyzmettiń 1424 Call-ortalyǵyna júgine alady», - Ádilhan Bádelhanuly.