Batys Qazaqstanda Han ordasy aýylynda kóne ǵımarattar jóndelip jatyr
ORAL. KAZINFORM — Batys Qazaqstan oblysy Bókeı ordasy aýdanynda Han ordasy mýzeı-qoryǵy quramyndaǵy respýblıkalyq mańyzy bar eki eskertkish – 1828 jyly salynǵan Han saraıy men qazynashylyq ǵımaratyna (1867 jyl) ǵylymı-restavratsııalaý jumystary júrgizilýde.
BQO mádenıet, tilderdi damytý jáne arhıv isi basqarmasynyń basshysy Qýanyshbek Muhanǵalıevtiń Kazinform tilshisine málim etkenindeı, bul maqsatqa respýblıkalyq bıýdjetten 136 mln teńge qaralǵan.
Onyń sózine qaraǵanda, «Qazqaıtajańartý» RMK Oral qalasy fılıalynyń qyzmetkerleri qos ǵımarattyń túp kelbetin saqtaı otyryp, syrtqy jáne ishki jóndeý jumystaryn atqarýda.
«Budan bir aı buryn QR Premer-mınıstriniń orynbasary Tamara Dúısenova Batys Qazaqstan oblysyna jasaǵan issapary aıasynda Han ordasy mýzeı-qoryǵyndaǵy atqarylyp jatqan isti oń baǵalady. Sonymen qatar 2026 jyly Bókeı handyǵynyń 225, Jáńgir han mektebiniń 185 jyldyq mereıtoılaryn joǵary deńgeıde atap ótý maqsatynda 2025 jyly mýzeı-qoryqtaǵy 10 nysanǵa ǵylymı-restavratsııalaý jáne mýzeılendirý jumystaryn aıaqtaý jóninde tapsyrma berdi. Búgingi tańda QR Úkimetiniń hattamalyq tapsyrmasy bar. Bul baǵytta QR Mádenıet jáne aqparat, Qarjy mınıstrlikterimen birlese jumystanyp jatyrmyz», dedi Q.Muhanǵalıev.
Basqarma basshysynyń aıtýynsha, Oral qalasy irgesinde ornalasqan, ortaǵasyrlyq qala mádenıeti men órkenıettiń damyǵanyn dáleldeıtin, Altyn Orda kezeńimen tuspa-tus keletin arheologııalyq eskertkish – «Jaıyq qalashyǵy tarıhı-mádenı mýzeı-qoryǵy» MKQK quryldy. Búgingi tańda zań organdarynda tirkelý, ujymdy ornalastyrý jáne uıymdastyrý jumystary júrgizilýde.
«Jalpy, oblysta 24 mýzeı bolsa, olarda 200 myńnan astam jádiger bar. Báıterek aýdany Darııan aýylyndaǵy M.Sholohov mýzeıin kúrdeli jóndeý úshin jobalaý-smetalyq qujattamasy jasaldy, qazirgi ýaqytta memlekettik saraptamadan ótkizilýde. Sol sekildi Jánibek aýdandyq tarıhı-ólketaný mýzeıi ornalasqan jalpy aýdany 243,6 sharshy metr eki qabatty ǵımarat aýdandyq ákimdik teńgeriminen oblysqa alyndy. Onda 2025 jyly oıshyl Ǵumar Qarashtyń 150 jyldyǵyna oraı mýzeıde jańa ekspozıtsııa qaıta jasaqtalady. Buǵan oblystyq bıýdjetten 20 mln teńge bólindi», dedi Q.Muhanǵalıev.
Eske sala keteıik, budan buryn Dúnıejúzilik kóshpendiler oıyndarynyń mádenı sharalaryna Batys Qazaqstannan 100-ge jýyq adam qatysatynyn jazǵan bolatynbyz.
Sondaı-aq «Qyz Jibek» ansambli Túrkııada halyqaralyq baıqaýda jeńimpaz atandy.
