Batys Qazaqstanda gýmanıtarlyq kómek qalaı úlestirilip jatyr
ORAL. KAZINFORM — Batys Qazaqstan oblysynda gýmanıtarlyq kómek qalaı uıymdastyrylyp jatyr? Sý tasqynynan zardap shekken turǵyndarǵa qalaı jetkizilýde? Mine, osy jóninde Batys Qazaqstan oblysy gýmanıtarlyq kómekti qabyldaý shtabynyń basshysy Aslan Tapıshev Kazinform tilshisine baıandap berdi.
Onyń aıtýynsha, shtab 5 sáýirde ashylǵannan beri óz qyzmetin barynsha atqarýda.
Mundaǵy basty maqsat — kelgen gýmanıtarlyq kómekti suryptap, daıyndap, ortaq bazaǵa engizip, qalalyq jáne aýdandyq shtabtarǵa jetkizý.
«Evakýatsııalyq pýnktterde jatqan turǵyndarǵa Úkimet tarapynan da, volonterlar men kásipkerler tarapynan da qajetti kómek kórsetilip jatyr. Qala boıynsha 2500-den astam erikti bógetterdi turǵyzýǵa atsalysty. Al 1 myńnan astam erikti gýmanıtarlyq kómekti suryptap, daıyndaýmen aınalysyp jatyr», — deıdi A.Tapıshev.
Shtab basshysynyń málimdeýinshe, 5 sáýirden beri oblysqa 1218,16 tonnadan astam gýmanıtarlyq kómek jetkizilse, sonyń 500 tonnasy — azyq-túlik, 244,2 tonnasy — turmystyq-gıgıenalyq zattar, 25 tonnasy — aýyz sý, 298 tonnasy — qurylys materıaldary. Sondaı-aq tósek jabdyqtary, sharýashylyq quraldary — qaıyqtar, gıdrokostıýmder bar.
«Oblystyq komıssııanyń sheshimine sáıkes Oral qalasy, Báıterek, Bórli, Terekti, Qaratóbe, Aqjaıyq aýdandaryna gýmanıtarlyq kómek úlestirilip berilýde. Oblystyq shtab arqyly jalpy 580 tonna gýmanıtarlyq kómek taratyldy. „AMANAT“ partııasy BQO fılıaly ǵımaratynda ornalasqan shtab arqyly Oral qalasynyń qıyn jaǵdaıǵa tap bolǵan 2 613 otbasyna azyq-túlik sebetteri jetkizildi», - deıdi A.Tapıshev.
Batys Qazaqstanǵa respýblıka óńirleri men qalalarynan ǵana emes, ózge elderden qolushyn sozyp jatqandar bar. Tek sońǵy kúnderdi aıtqannyń ózinde, mysaly, 22 sáýirde Daǵystan Respýblıkasynan 11 tonna kómek keldi. Munyń negizgi bóligi — tamaq ónimderi, sharýashylyq zattary jáne qural-saımandar. Sol kúni Shymkent qalasynan sondaı júk tıelgen 60 tonna kómek jetkizildi. Buǵan 23 sáýirde Almaty qalasynyń meshit jamaǵaty jibergen 20 tonna kómekti qosýǵa bolady. Al 24 sáýirde Tájikstan Respýblıkasynan 7 vagonmen 355 tonna gýmanıtarlyq kómek Oralǵa jetti. Munyń 180 tonnasy — tsement, 118 tonnasy — shıfer, 32 tonnasy — kıim-keshek, ydys-aıaq, rezeńke etikter, 25 tonnasy — aýyz sý.
Batys Qazaqstanǵa alǵashqylardyń qatarynda Qyrǵyz Respýblıkasy Tótenshe jaǵdaılar mınıstrliginiń 4 júk kóligimen 80 tonna gýmanıtarlyq kómektiń jetkizilgenin atap ótý kerek.
«Biz osyndaı qysyltaıań sátte kómek qolyn sozǵan jandardyń bárine shyn júrekten rızashylyǵymyzdy bildiremiz», - dedi A.Tapıshev.
Eske sala keteıik, budan buryn Oral qalasynda 10 evakýatsııalyq pýnktte 2 400-den astam adam ornalasqanyn jazǵan bolatynbyz.
BQO-da Jaıyq ózenindegi sý deńgeıi Taıpaqtan basqa gıdrobekette tómendedi.
