Batys Qazaqstanda gonkong tumaýyna shaldyqqandar sany 150-den asty

ORAL. KAZINFORM — Batys Qazaqstan oblysynda bıylǵy 1 qazannan bastap 48 639 adamnyń jedel respıratorlyq vırýstyq ınfektsııamen (JRVI) aýyrǵany tirkeldi.

BQO sanıtarııalyq-epıdemıologııalyq baqylaý departamentiniń baspasóz qyzmetinen málim etkenindeı, sonyń ishinde 34 592-si — 14 jasqa deıingi balalar. Munyń 521-i 1 jasqa tolmaǵan. Sonymen qatar 99 júkti áıeldiń JRVI juqtyrǵany belgili boldy.

Osy kezeńde 154 adamnan tumaýdyń A tıpiniń H3N2 vırýsy anyqtalǵan. Bul ótken jyldyń osy kezeńimen salystyrǵanda 3,02 esege ósken. Bulardyń ishinde 109-y — 14 jasqa deıingi balalar, 12-si — júkti áıelder.

— Qazirgi tańda oblys boıynsha 12 mektepte 32 synyp qashyqtan oqytý úrdisin jalǵastyryp jatyr. Sonyń ishinde sońǵy aptada Syrym aýdany bilim ordalarynda qashyqtan oqýshylar sany kóbeıip ketkeni baıqalady. Qazir munda 2 mektepte 7 synyp (140 oqýshy) onlaın bilim alyp jatyr. Sondaı-aq Oral qalasynda 2 mektepte 3 synyp (66 oqýshy), Báıterek aýdanynda 2 mektepte 4 synyp (66), Aqjaıyqta 1 mektepte 3 synyp (59) qashyqtan oqýǵa kóshirilgen, — dep habarlady vedomstvodan.

Eske sala keteıik, budan buryn Batys Qazaqstanda 37 synyptyń qashyqtan oqytýǵa aýystyrylǵanyn jazǵan bolatynbyz.