Batys Qazaqstanda esepshi 7 mln teńge bıýdjet qarajatyn qumar oıynǵa salyp jibergen

ORAL. KAZINFORM — Batys Qazaqstan oblysynda esepshi 7 mln teńge bıýdjet qarajatyn qumar oıynǵa jumsap jibergen.

BQO prokýratýrasynyń baspasóz qyzmetinen málim etkendeı, oqıǵa Qaratóbe aýdanynda boldy. 

Qaratóbe aýdany prokýratýrasy sotqa deıingi tergeýdiń biryńǵaı tizilimine QR QK 189-baby 3-bólimi 1-tarmaǵyna (iri mólsherde senip tapsyrylǵan bóten múlikti ıemdenip alý nemese talan-tarajǵa salý) sáıkes materıaldy tirkep, BQO boıynsha ekonomıkalyq tergep-tekserý departamentine joldady. 

«Qaratóbe aýdany ákimdigi ishki saıasat bólimi Jastar resýrstyq ortalyǵy esepshisiniń qumar oıynmen aınalysqany anyqtaldy. Esepshi basshynyń ruqsatynsyz jáne buıryǵynsyz onyń ETsQ-syn paıdalana otyryp, 7 mln teńgege jýyq bıýdjet qarajatyn jymqyrǵan. Esepshi jaýabynda óziniń jáne jubaıynyń atyna ashylǵan jeke kásipkerlik sýbektisine bıýdjet qarjysyn birneshe ret aýdaryp kelgenin aıtty. Qazirgi tańda ony ekonomıkalyq tergep-tekserý departamenti kúdikti retinde tanydy. Kinási dáleldengen jaǵdaıda oǵan 7 jylǵa deıin bas bostandyǵynan aıyrý jazasy taǵaıyndalýy múmkin» dep habarlady vedomstvodan.

Eske sala keteıik, budan buryn Azamat Qustanovtyń BQO prokýrorynyń orynbasary bolyp taǵaıyndalǵanyn jazǵan edik.