Batys Qazaqstanda erigen qar sýy joldyń ústine shyǵyp ketti
ORAL. KAZINFORM — Batys Qazaqstan oblysy Kaztalov aýdanynda Qaıyńdy-Aqpáter-Jalpaqtal-Juldyz-Qarasý avtojolynda sýdyń joldyń ústine shyǵyp ketkeni jóninde beınejazba taraldy.
Kaztalov aýdany Kómekshi aýylynyń turǵyny Aızada Ýlıanovanyń málim etkenindeı, atalmysh joldyń Qabansaı tusynda sý molynan aǵyp jatyr.
— Telegeı teńiz sý. Qatynas qıynǵa aınaldy. Jylda qaıtalanatyn, ábden jyr bolǵan jaǵdaı osy. Endi jańbyr jaýsa, qatynas múldem toqtaıdy. Asfalt salynady dep kútkenimizge qansha jyl boldy. Biz de tas jolmen júrgimiz keledi, — deıdi A.Ýlıanova.
Osyǵan baılanysty Kazinform tilshisi Kaztalov aýdany ákimdigine arnaıy saýal joldaǵan edi.
Ákimdikten alynǵan málimetke qaraǵanda, qar qatty erigendikten, BQO jolaýshylar kóligi jáne avtomobıl joldary basqarmasynyń teńgerimindegi atalmysh joldyń tómen ornalasqan bóliginde sýdyń asyp ótýi oryn alýda. Jol — topyraq jamylǵyly, eni 10 metr, sý asyp ótken bóliktiń uzyndyǵy shamamen 100 m, tereńdigi 2-5 sm.
— Atalǵan problemalyq ýchaskede osy jolǵa qyzmet kórsetetin «SSS Stroy» JShS tarapynan tıisti jol belgileri ornatylyp, aýyr arnaıy tehnıkanyń kezekshiligi uıymdastyryldy. Sondaı-aq jergilikti atqarýshy organ tarapynan kezekshilik qamtamasyz etildi. Avtokólik qozǵalysy buzylǵan joq. Eldi mekenderge qaýip joq. Jaǵdaı aýdan ákimdiginiń baqylaýynda, — dep habarlady vedomstvodan.
BQO jolaýshylar kóligi jáne avtomobıl joldary basqarmasynyń basshysy Marat Qýanshalıevtiń naqtylaýynsha, Algaı-Jalpaqtal-Juldyz-Qarasý jolynyń 70-90 shaqyrym bóligine (Qabansaı jaǵy) qatqyl tabandy jol salý úshin jobalyq-smetalyq qujattama jasalǵan.
— Qazirgi kezde qujattama memlekettik saraptamadan ótkizilip jatyr. Bári de qarajatqa baılanysty, joldyń qashan salynatyny ázirge belgisiz. Múmkin, bıyl bastap ketermiz, — dep qosty basqarma basshysy.
Eske sala keteıik, budan buryn Batys Qazaqstanda shalǵaı aýyldarǵa asfalt jol qashan salynatynyn jazǵan bolatynbyz.
Sondaı-aq BQO-da turǵyndar joldyń nasharlyǵyn aıtyp, narazylyq bildirdi.
BQO-da joldy kútip ustamaǵan merdiger mekemege aıyppul salyndy.